Për dekada me radhë, familja Kennedy është përballur me një sërë tragjedish që kanë lënë gjurmë të thella në historinë e saj. Vdekje të papritura, aksidente fatale dhe atentate kanë bërë që mediat tabloide ta lidhin mbiemrin Kennedy me atë që është quajtur “Mallkimi i Kennedy-ve”.
Nga humbjet në luftë, atentatet gjatë fushatave zgjedhore dhe aksidentet ajrore, te aksidentet në ski dhe ndërhyrjet e dështuara kirurgjikale në tru, familja Kennedy është goditur vazhdimisht nga fatkeqësitë. Për të kuptuar se si lindi ideja e “Mallkimit të Kennedy-ve”, duhet të kthehemi te Joseph P. Kennedy Sr. dhe Rose Fitzgerald Kennedy.
Le t’i hedhim një vështrim historisë së familjes Kennedy përmes këndvështrimit të këtij të ashtuquajturi mallkim.
GJENERATA E PARË
Joseph dhe Rose Kennedy patën nëntë fëmijë: JoeJr., John (JFK), Rosemary, Kathleen, Eunice, Patricia, Robert (Bobby), Jean dhe Edward (Ted) Kennedy-in.
Rosemary Kennedy thuhet se kishte vështirësi në zhvillimin intelektual, gjë që e bënte më “rebele” se motrat dhe vëllezërit e saj. Në vitin 1941, kur ishte 23 vjeçe, babai i saj, Joe Sr., organizoi që Rosemary t’i nënshtrohej një lobotomie, një ndërhyrje kirurgjikale ku hiqet një pjesë e trurit, me shpresën se do t’i ndryshonte sjelljen, edhe pse kjo procedurë kishte rezultate shumë të dobëta. Pas operacionit, Rosemary humbi aftësinë për të ecur dhe për të folur. Ajo jetoi pjesën tjetër të jetës me aftësi të kufizuara fizike në institucione të specializuara, deri sa vdiq në moshën 86-vjeçare në vitin 2005.
Joe Jr. u regjistrua në Marinën e Shteteve të Bashkuara në vitin 1941 dhe humbi jetën gjatë një misioni ajror në Luftën e Dytë Botërore, në vitin 1944. Ai ishte viktima e parë nga shumë tragjedi ajrore që do të godisnin familjen Kennedy. Katër vjet më vonë, në vitin 1948, Kathleen “Kick” Kennedy ndodhej në një avion të vogël që u rrëzua gjatë një stuhie, duke vrarë të katër personat në bord.
Më i njohur është atentati ndaj ish-presidentit amerikan John F. Kennedy, i cili edhe sot mbetet objekt teorish konspirative. Vëllai i dytë më i madh i familjes u vra në Dallas, Teksas, në vitin 1963, ndërsa kërkonte mbështetje për rizgjedhjen e tij. Pesë vjet më vonë, në vitin 1968, edhe vëllai i tij më i vogël, Bobby Kennedy, u vra gjatë fushatës presidenciale, pasi kishte fituar zgjedhjet paraprake të demokratëve në Kaliforni.
Fëmija më i vogël i familjes, Ted Kennedy, i cili i mbijetoi një aksidenti fatal me avion në vitin 1964, ishte i pari që foli publikisht për “Mallkimin e Kennedy-ve”. Kjo ndodhi pasi në vitin 1969 makina që ai drejtonte ra nga një urë në ishullin Chappaquiddick, aksident ku mbeti e bllokuar dhe humbi jetën pasagjerja 28-vjeçare Mary Jo Kopechne. Sipas CNN, senatori i ndjerë i Massachusetts pyeste veten nëse “ndonjë mallkim i tmerrshëm rëndonte vërtet mbi të gjithë Kennedy-t” pas kësaj tragjedie.
GJENERATA E DYTË DHE E TRETË
Tragjeditë vazhduan edhe te brezat e dytë dhe të tretë të familjes Kennedy.
Në vitin 1963, Jacqueline Kennedy solli në jetë fëmijën e tretë të saj dhe të JFK-së, Patrick-un. Foshnja lindi gjashtë javë para kohe dhe vdiq vetëm dy ditë më vonë për shkak të një sëmundjeje të mushkërive. Dhjetë vjet më vonë, djali i Ted Kennedy-t, EdwardJr., humbi njërën këmbë nga kanceri i kockave, kur ishte vetëm 12 vjeç.
David Kennedy, djali i Ethel dhe Robert F. Kennedy, vdiq nga një mbidozë droge në vitin 1984, në moshën 28-vjeçare. Një tjetër djalë i tyre, Michael, humbi jetën në një aksident me ski në vitin 1997, kur ishte 39 vjeç.
Në vitin 1999, John F. Kennedy Jr. po pilotonte një avion me bashkëshorten e tij, Carolyn Bessette, dhe kunatën, Lauren Bessette. Ai humbi orientimin gjatë fluturimit dhe avioni u rrëzua, duke vrarë të tre personat që ndodheshin në bord.
Së fundmi, në vitin 2019, mbesa e Robert dhe Ethel Kennedy-t, Saoirse Kennedy Hill, vdiq në moshën 22-vjeçare si pasojë e një “mbidoze aksidentale”, sipas revistës People.
Në vitin 2020, një tjetër mbesë e tyre, Maeve Kennedy Townsend McKean, dhe djali i saj tetëvjeçar, Gideon, pjesëtar i brezit të katërt të familjes Kennedy, humbën jetën gjatë një aksidenti me kanoe në Gjirin Chesapeake.
MALLKIMI I KENNEDY-VE
Shumë libra janë shkruar për të ashtuquajturin “Mallkimi i Kennedy-ve”, duke ushqyer për dekada spekulimet rreth kësaj familjeje. Në vitin 2019, J. Randy Taraborrelli, autor i librit The Kennedy Heirs, deklaroi për revistën People se, përveç Ted Kennedy-t, i cili e përmendi mundësinë e një mallkimi pas aksidentit në Chappaquiddick, pjesëtarët e familjes Kennedy nuk kanë besuar kurrë se ishin të mallkuar.
EdwardJr. dhe Patrick Kennedy kanë kundërshtuar publikisht këtë ide. Edward është shprehur: “Familja Kennedy i ka përjetuar këto tragjedi në sy të publikut. Por në shumë aspekte, familja jonë është si çdo familje tjetër amerikane.”
Edhe Eunice Kennedy Shriver e ka hedhur poshtë idenë e një mallkimi. Sipas saj, “mallkimi” i vërtetë nuk ishin tragjeditë, por vëmendja e pandërprerë e mediave tabloide dhe mungesa e privatësisë që familja u detyrua të përballonte sa herë ndodhte një fatkeqësi.
