Republikanët në Senatin amerikan konfirmuan të shtunën, me një diferencë të ngushtë votash, Todd Blanche në postin e Prokurorit të Përgjithshëm të SHBA-së, duke i dhënë fund një prej përplasjeve më të debatueshme për kabinetin gjatë mandatit të dytë të Presidentit Donald Trump.
Emërimi i Blanche pothuajse u bllokua për shkak të shqetësimeve të ngritura nga senatorë të të dyja partive lidhur me pavarësinë e tij.
Blanche u konfirmua me 50 vota pro dhe 49 kundër, ndërsa senatorët republikanë Susan Collins dhe Lisa Murkowski votuan kundër. Senatori Bill Cassidy ishte vota vendimtare, pasi të premten kishte deklaruar se Blanche ishte kandidati më i mirë që Trump mund të propozonte.
Votimi përmbylli një përplasje disa-javore mes republikanëve të Senatit dhe administratës Trump për kandidaturën e Blanche, i cili ka shërbyer si Prokuror i Përgjithshëm në detyrë që nga prilli dhe më herët ka drejtuar operacionet e përditshme të Departamentit të Drejtësisë si zyrtari i dytë më i lartë i tij.
Blanche do të marrë drejtimin e një Departamenti të Drejtësisë që ka pësuar ndryshime të mëdha gjatë vitit të parë e gjysmë të mandatit të dytë të Trumpit.
Blanche ka argumentuar se gjatë kohës së tij në detyrë ka ndihmuar në uljen e krimit në nivele rekord dhe ka korrigjuar ato që ai i konsideron padrejtësi të kryera nga administrata Biden ndaj Trumpit dhe aleatëve të tij konservatorë.
Mbështetësit e Blanche thonë se ai është i përkushtuar ndaj misionit kryesor të Departamentit të Drejtësisë për të garantuar sigurinë e vendit.
“Zoti Blanche është një prokuror i vendosur dhe i drejtë, i përkushtuar ndaj sundimit të ligjit, dhe lidershipi i tij po ngjall të njëjtin përkushtim në të gjithë Departamentin e Drejtësisë”, tha të premten senatori Chuck Grassley, kryetari i Komitetit Gjyqësor të Senatit, i cili mbështeti kandidaturën e Blanche.
Disa republikanë skeptikë kanë thënë se Blanche, i cili kaloi gati një dekadë si prokuror karriere në Nju Jork, është ndoshta kandidati më i pranueshëm që Trump mund të kishte propozuar dhe se, në një mandat të përhershëm, ai ka më shumë gjasa t’i rezistojë presionit të Shtëpisë së Bardhë.
