“Gjëja më e keqe për një artist është kur vepra e tij zhduket”, tha Hörl për dpa. Ai tha se e shqetësonte gjithashtu mungesa e respektit për veprën e tij.
Skulpturat e vogla u vendosën në mesin e korrikut, përfshirë në Kopshtet Mirabell të Salzburgut, një pikë e frekuentuar nga turistët, për të shënuar 270-vjetorin e lindjes së kompozitorit Wolfgang Amadeus Mozart.
Hörl tha se nuk besonte se ishin pushuesit ata që kishin marrë figurat e Mozartit, të cilat ishin 50 centimetra të larta. “Kjo është vjedhje e organizuar”, tha artisti.
Figurat prej plastike me shumë gjasë u vodhën gjatë natës nga parku publik, kur Kopshtet Mirabell mbyllen. “Më duket pak e pacipë”, tha ai.
Por nuk bëhej fjalë për një grabitje milionahe. Hörl tha se do t’i kishte shitur Mozartët e vegjël për 90 euro (104 dollarë) secilin pas përfundimit të ekspozitës, që do të thotë se humbjet e tij totale janë rreth 20,000 euro.
Meqenëse prodhuesi i skulpturave është me pushime, figurat zëvendësuese të Mozartit nuk mund të vendosen. Disa dhjetëra prej tyre mund të shihen ende deri në fund të gushtit në Mozarteum dhe në shtëpinë e lindjes së Mozartit në Salzburg.
Hörl është i njohur për instalacionet e tij me figura të prodhuara në seri të personaliteteve të famshme. Ai ka vendosur ushtri të vogla me figura të Schillerit, Goethes dhe Hölderlin-it në qytete gjermane.
Edhe në këtë rast ka ndodhur një incident i ngjashëm me atë në Salzburg. Gjatë një fushate në Bayreuth, u vodhën 100 figura të kompozitorit Richard Wagner.
