Rodri raportohet se i ka kërkuar Fermin Lopezit të heqë dorë nga fanella me numrin 16, pasi mesfushori i Manchester Cityt është pranë transferimit te Barcelona.
30-vjeçari është lidhur gjatë kësaj vere me një largim nga Manchester City dhe, sipas raportimeve, ka zgjedhur Barcelonën përpara rivalit të saj, Real Madridit.
Barcelona thuhet se ka arritur marrëveshje për transferimin e Rodrit për rreth 75.3 milionë euro, ndërsa zyrtarizimi pritet të bëhet së shpejti. Reprezentuesi spanjoll pritet të nënshkruajë kontratë katërvjeçare me klubin katalanas.
Sipas Fabrizio Romanos, Rodri dëshiron të vazhdojë të mbajë numrin 16, të cilin e ka përdorur gjatë karrierës së tij, dhe këtë kërkesë ia ka bërë të ditur Fermin Lopezit gjatë bisedave të fundit mes tyre.
Lopez pritet të kalojë në fanellën me numrin 7, e cila më parë është mbajtur nga futbollistë të njohur si Ousmane Dembele dhe Antoine Griezmann.
Ndërkohë, një tjetër numër i rëndësishëm ka mbetur i lirë te Barcelona. Pas largimit të Robert Lewandowskit, fanella me numrin 9 është ende pa një pronar të ri.
Sipas mediumit spanjoll SPORT, Barcelona po e ruan këtë numër për objektivin e saj afatgjatë në merkato, Julian Alvarez, i cili vazhdon të lidhet me një transferim te gjiganti katalanas.
Ndërkohë, Karim Adeyemi, një tjetër përforcim i Barcelonës këtë verë, raportohet se ka shfaqur preferencën për fanellën me numrin 14.
