Gjashtë persona kanë mbetur të plagosur të premten pasdite, pasi një tabelë reklamuese u shemb mbi pjesëmarrësit në një festival muzikor të krishterë në West Sussex të Britanisë së Madhe. Ngjarja ndodhi në Festivalin e Kishës së Madhe, pranë Steyning, rreth orës 15:30 me kohën lokale.
Pas raportimeve për disa persona që kishin nevojë për ndihmë mjekësore, në vendngjarje u mobilizuan disa ambulanca dhe ekipe mjekësore.Organizatorët njoftuan pezullimin e festivalit pas asaj që e cilësuan si një “incident serioz”, duke bërë të ditur se asnjë aktivitet tjetër nuk do të zhvillohej gjatë së premtes.
“Para së gjithash, mendimet dhe lutjet tona janë me ata që janë prekur drejtpërdrejt nga incidenti”, deklaruan organizatorët, ndërsa shprehën keqardhje për mijëra pjesëmarrësit që ishin mbledhur në festival. Ata thanë se po bashkëpunojnë me shërbimet e emergjencës dhe autoritetet për të menaxhuar situatën dhe se informacionet e mëtejshme do të bëhen publike në vijim.
Pas incidentit, pjesëmarrësve iu kërkua të largoheshin nga zona e festivalit. Kampistëve iu tha të ktheheshin në hapësirat e tyre të kampingut dhe të prisnin udhëzimet e radhës, ndërsa atyre që dëshironin të largoheshin iu dha kjo mundësi.
Shkaqet e rrëzimit të tabelës dhe gjendja e plotë e të plagosurve pritet të bëhen të ditura pas hetimeve të autoriteteve.
