Një akuzë e fortë ndaj kongresmenes demokrate Ilhan Omar ka rikthyer në qendër të debatit në SHBA të kaluarën e saj të emigracionit. Sekretari i Sigurisë Kombëtare, Mark Wayne Mullin, pretendoi se politikania nga Minesota ishte martuar me vëllain e saj për ta ndihmuar atë të emigronte në Shtetet e Bashkuara. Ai tha se çështja po hetohet nga autoritetet amerikane dhe nuk përjashtoi mundësinë e deportimit të Omarit nëse do të provohej se ajo kishte dhënë informacione të rreme gjatë procesit të emigracionit apo natyralizimit.
Duke folur për podkasterin konservator Benny Johnson në margjinat e konventës republikane për zgjedhjet e mesit të mandatit në Dallas, Mullin u shpreh i bindur për pretendimin kontrovers. “Ne e dimë që ajo u martua me vëllain e saj për të provuar ta sillte atë në Shtetet e Bashkuara”, deklaroi ai, duke shtuar se ish-burri i Omarit aktualisht jeton në Londër. Sipas Mullin, hetimi mund të mos kufizohet vetëm te martesa me Ahmed Noor Said Elmi, por mund të përfshijë edhe mënyrën se si anëtarë të familjes së Omarit kanë emigruar në SHBA.
“Mund të ketë më shumë në këtë rast, për sa i përket imigracionit të përgjithshëm familjar dhe ndoshta disa aktiviteteve të paligjshme në lidhje me mënyrën se si ata erdhën në Shtetet e Bashkuara në radhë të parë”, tha ai.
Sekretari i Sigurisë Kombëtare la të hapur edhe mundësinë që hetimi të ketë pasoja për statusin e Omarit si shtetase amerikane, nëse autoritetet arrijnë të provojnë se ajo ka dhënë informacione të rreme gjatë procedurave të emigracionit ose natyralizimit. “Nëse keni gënjyer për gjëra specifike në aplikimin tuaj, kjo nuk është e parashkruar. Nëse mund të vërtetojmë se nuk duhet të ishit këtu që në fillim, do t’ju deportojmë”, u shpreh ai. Megjithatë, Mullin theksoi se hetimi është ende në zhvillim dhe se çdo veprim ligjor duhet të mbështetet në prova dhe jo në motive politike.
“Nëse do të ecim përpara me një çështje, dua të sigurohem që kjo të mos jetë një çështje politike, por një çështje e vërtetë, sepse dikush bëri diçka të paligjshme”, tha ai. Ilhan Omar, e lindur në Somali, u bë shtetase amerikane në vitin 2000. Në qendër të akuzave është Ahmed Noor Said Elmi, me të cilin Omar u martua ligjërisht në shkurt të vitit 2009. Kongresmenja demokrate i ka mohuar vazhdimisht pretendimet se Elmi është vëllai i saj.
Në vitin 2016, Omar i cilësoi këto pretendime si “absurde dhe fyese”. Ajo ka deklaruar se marrëdhënia me Elmin ishte e shkurtër dhe se ata kishin qenë të ndarë për pjesën më të madhe të martesës. Divorci i tyre u finalizua në vitin 2017. Një vit më pas, në janar 2018, Omar u martua ligjërisht me Ahmed Abdisalan Hirsi, me të cilin kishte pasur më herët fëmijë. Pretendimet se Omar dhe Elmi ishin vëlla e motër kishin qarkulluar prej vitesh, fillimisht në komunitetet online të diasporës somaleze. Në vitin 2020, blogeri dhe aktivisti somalez në Minesota, Abdihakeem Osman, pretendoi se e kishte njohur Omarin që nga vitet e tyre të rritjes në Minesota dhe se ajo ua kishte prezantuar Elmin anëtarëve të komunitetit si vëllain e saj nga Londra. Edhe këtë pretendim Omar e ka mohuar.
Çështja është rikthyer fuqishëm në debatin politik amerikan gjatë muajve të fundit. Edhe presidenti Donald Trump dhe zëvendëspresidenti J.D. Vance kanë bërë deklarata publike lidhur me pretendimet për mashtrim në procesin e emigracionit. Vance është shprehur se beson se Omar “ka kryer mashtrim me imigracionin kundër Shteteve të Bashkuara”, ndërsa Trump ka deklaruar publikisht se beson se kongresmenja demokrate “u martua me vëllain e saj”. Omar nuk është dënuar për mashtrim me imigracionin dhe i ka cilësuar akuzat si të motivuara politikisht. Mashtrimi martesor në SHBA është vepër penale federale dhe mund të dënohet deri në pesë vjet burg dhe me gjobë deri në 250 mijë dollarë.
