Një plagosje me armë zjarri është regjistruar pak momente më parë në qytetin e Durrësit. Ngjarja ka ndodhur në lagjen nr. 1, në zonën e Vollgës.
Mësohet se një i ri ka mbetur i plagosur dhe është transportuar me ambulancë drejt Spitalit Rajonal të Durrësit, ku po merr ndihmën mjekësore.
Në vendngjarje ndodhen efektivët e Policisë, të cilët kanë nisur veprimet për të dokumentuar rrethanat e ngjarjes.
Ende nuk dihen rrethanat e sakta të plagosjes, ndërsa detaje të reja pritet të zbardhen në vijim.
Durrës/Informacion paraprak
Rreth orës 17:30, në lagjen Nr. 1, Durrës, shtetasi F. F., 61 vjeç, banues në lagjen Nr. 1, Durrës, dyshohet se për motive të dobëta, ka plagosur me armë zjarri në dorë shtetasin E. Sh., 52 vjeç, banues në Durrës, i cili ndodhet jashtë rrezikut për jetën.
Shërbimet e Policisë kanë shkuar menjëherë në vendngjarje, janë ngritur pika kontrolli dhe vijon kontrolli i zonës, me qëllim kapjen e autorit.
Grupi hetimor, nën drejtimin e Prokurorisë, vijon punën për zbardhjen dhe dokumentimin e plotë të rrethanave të ngjarjes.
