Të paktën shtatë persona kanë humbur jetën dhe gjashtë të tjerë rezultojnë të zhdukur pranë Tokios, pas kalimit të tajfunit Dujuan në Japoni.
Pesë viktima janë regjistruar në prefekturën Chiba, në lindje të Tokios, ndërsa dy të tjerë kanë humbur jetën në prefekturën Kanagawa, në jugperëndim të kryeqytetit japonez.
Ndërkohë, vijojnë operacionet e kërkim-shpëtimit për personat e zhdukur pas rrëshqitjeve të dheut të shkaktuara nga reshjet e dendura.
Në prefekturën Chiba, rreth 58 mijë familje kanë mbetur pa energji elektrike, sipas kompanisë së energjisë Tepco. Më shumë se 460 banesa në këtë zonë janë dëmtuar nga moti i keq.
Agjencia Meteorologjike e Japonisë ka hequr ose ulur shumicën e paralajmërimeve për reshje të dendura dhe rrëshqitje dheu, ndërsa tajfuni Dujuan po largohet nga verilindja e vendit.
Përpara mbërritjes së tajfunit, më shumë se 1.6 milionë banorë të Tokios dhe zonave përreth u urdhëruan të evakuoheshin nga banesat e tyre. Për shkak të motit të keq u anuluan gjithashtu më shumë se 275 fluturime.
Tajfunet godasin shpesh Japoninë gjatë fundit të verës dhe fillimit të vjeshtës. Shkencëtarët kanë paralajmëruar se ndryshimet klimatike të shkaktuara nga aktiviteti njerëzor po kontribuojnë në rritjen e shpeshtësisë dhe intensitetit të ngjarjeve ekstreme të motit.
