Nga Samuel Wahl, L’EXPRESS
Nga shërbimet sekrete në arrest shtëpie. Drejtuesja e Shërbimit Informativ të Shtetit shqiptar (SHISH), Vlora Hyseni, iu dorëzua autoriteteve të martën, më 22 shtator, pasi Prokuroria e Posaçme kundër Korrupsionit dhe Krimit të Organizuar (SPAK) kishte nxjerrë një urdhër arresti ndaj saj. Bashkë me të, edhe ish-drejtori i Policisë së Shtetit, Ilir Proda, i shkarkuar më herët këtë vit, u paraqit të martën për të njëjtën çështje.
Prokurorët deklaruan se Hyseni dyshohet se ka zbuluar informacione të klasifikuara te persona të paautorizuar, në kuadër të një çështjeje korrupsioni në Agjencinë Kombëtare të Shoqërisë së Informacionit (AKSHI).
Kjo agjenci, e cila është drejtpërdrejt nën mbikëqyrjen e kryeministrit Edi Rama, synon të drejtojë një pjesë të madhe të transformimit digjital që po zhvillohet në Shqipëri. Bëhet fjalë për një projekt kryesor të programit të modernizimit të shtetit të promovuar nga Rama që prej ardhjes së tij në pushtet në vitin 2013.
Lidhje që ngjallin dyshime
Dyshimet ndaj Vlora Hysenit lidhen me marrëdhëniet e saj me Ergys Agasin, një biznesmen me ndikim që tashmë është arrestuar në kuadër të dosjes së AKSHI-t dhe që dyshohet, ndër të tjera, se është në qendër të një rrjeti të lidhur me parregullsi në tenderët publikë të agjencisë.
Sipas prokurorisë, Hyseni dhe Agasi mund të kenë pasur kontakte që shkonin përtej kuadrit profesional. Sipas BalkanWeb, dosja e SPAK përmban komunikime në të cilat Vlora Hyseni dyshohet se e ka informuar Agasin për lëvizjet dhe takimet e saj profesionale, veçanërisht për takimet me Edi Ramën dhe drejtorin e Policisë. Ajo dyshohet se ka ndarë gjithashtu informacione lidhur me emërime të mundshme politike.
Kjo nuk është hera e parë që Vlora Hyseni gjendet në qendër të dyshimeve që lidhen me zbulimin e informacioneve konfidenciale. Që në vitin 2021, ajo ishte shkarkuar nga posti i zëvendësdrejtoreshës së Agjencisë së Inteligjencës së Kosovës. Arsyet zyrtare të shkarkimit të saj nuk ishin bërë publike në atë kohë. Megjithatë, mediat kishin raportuar për dyshime mbi rrjedhje informacioni, ndërsa disa prej tyre kishin përmendur lidhje të mundshme me Serbinë, gjë që Hyseni e kishte mohuar.
Dy vjet më vonë, karriera e saj në Kosovë u rikthye në qendër të debatit kur ajo u emërua në krye të SHISH-it në vitin 2023. Opozita shqiptare e kishte vënë veçanërisht në pikëpyetje këtë zgjedhje, duke ngritur pyetje mbi rrethanat e largimit të saj nga shërbimet e inteligjencës kosovare.
Një tjetër goditje për Ramën
Të martën në mbrëmje, presidenti shqiptar Bajram Begaj, me propozim të kryeministrit, dekretoi shkarkimin e Vlora Hysenit nga posti i drejtoreshës së Shërbimit Informativ të Shtetit.
“Çdokush prezumohet i pafajshëm deri në vendimin përfundimtar, por askush nuk është mbi ligjin, në asnjë rrethanë dhe për asnjë arsye”, reagoi Edi Rama në X.
Pak më pas, ai firmosi një urdhër që i delegon përkohësisht kompetencat administrative të drejtorit të inteligjencës shtetërore drejtorit të Departamentit të Operacioneve, Elvis Lila.
Kjo çështje përbën një tjetër goditje për qeverinë Rama. Në shkurt 2026, kryeministri ishte detyruar tashmë të ndahej nga zëvendëskryeministrja e tij, Belinda Balluku, e cila ishte objekt i një hetimi nga SPAK mbi dyshime për parregullsi në dhënien e tenderëve publikë.
Nga ana e tyre, zyrtarët e Bashkimit Evropian i deklaruan Reuters se po e shqyrtonin nga afër mënyrën se si Rama po menaxhon çështjet e korrupsionit dhe se lufta e Shqipërisë kundër krimit dhe korrupsionit është thelbësore për kandidaturën e vendit ballkanik për t’iu bashkuar bllokut deri në vitin 2030.
