Ish-sulmuesi i Anglisë dhe Liverpool, Andy Carroll, ka zbuluar në autobiografinë e tij të re një përvojë të rëndë që, sipas rrëfimit të tij, e ka ndikuar për vite me radhë.
Në librin Owning It, 37-vjeçari tregon se në vitin 2021 ishte sulmuar seksualisht nga një person që ai e njihte dhe e përshkruan si një figurë të njohur.
Sipas Carroll, ai kishte konsumuar disa pije dhe ishte shtrirë për të fjetur. Më vonë u zgjua dhe kuptoi se personi në fjalë po e sulmonte seksualisht.
Futbollisti tregon se arriti ta nxirrte personin nga shtëpia, ndërsa më pas pati një përplasje fizike kur ai tentoi të kthehej. Carroll telefonoi policinë dhe kujton se më pas shpërtheu në lot në krahët e dados së fëmijëve të tij.
Personi në fjalë u arrestua dhe më vonë u shpall fajtor për vepra seksuale. Sipas BBC, ai u dënua me tre vite burg. Carroll dëshmoi gjatë procesit gjyqësor.
Ish-futbollisti thotë se ngjarja pati ndikim të madh në jetën e tij dhe se për një kohë të gjatë e kishte të vështirë të përqendrohej edhe te futbolli.
Carroll ka treguar se kishte hezituar për vite për ta bërë publike përvojën, ndërsa vendosi ta përfshinte në autobiografi vetëm në momentet e fundit.
“E mendoja çdo ditë”, rrëfen ai në libër, duke shpjeguar se trauma vazhdonte ta ndiqte edhe pas kalimit të kohës.
Sipas Carroll, arsyeja përse vendosi të fliste publikisht ishte edhe dëshira për t’u dhënë kurajë njerëzve të tjerë që mund të kenë kaluar përvoja të ngjashme.
Carroll, i cili ka luajtur gjatë karrierës për Newcastle, Liverpool dhe Anglinë, aktualisht është pjesë e Dagenham & Redbridge, ku përveçse luan, mban edhe rolin e ndihmës-trajnerit.
