Të paktën 11 persona kanë humbur jetën dhe 30 të tjerë janë plagosur pas një sulmi me bombë në një pikë kontrolli të policisë në veriperëndim të Pakistanit.
Sulmi ndodhi të shtunën në distriktin Dera Ismail Khan, në provincën Khyber Pakhtunkhwa, kur një automjet i ngarkuar me eksploziv shpërtheu teksa po kalonte nëpër pikën e kontrollit. Sipas zëdhënësit të shërbimit lokal të shpëtimit, Bilal Faizi, nga vendngjarja janë nxjerrë 11 trupa, ndërsa të plagosurit, disa prej të cilëve ndodhen në gjendje kritike, janë transportuar në një spital aty pranë.
Pamjet e publikuara nga vendi i ngjarjes tregojnë një re të madhe tymi gri që ngrihet pas shpërthimit. Përgjegjësinë për sulmin e ka marrë Tehrik-e-Taliban Pakistan (TTP), organizata militante e njohur si talebanët pakistanezë. Pakistani është përballur me një rritje të sulmeve militante gjatë viteve të fundit, ku përgjegjësinë për disa prej tyre e kanë marrë TTP dhe Ushtria Çlirimtare e Baluçistanit (BLA). TTP është një organizatë e ndryshme nga talebanët afganë, megjithëse të dyja grupet kanë marrëdhënie aleate. Talebanët afganë u rikthyen në pushtet në Afganistan në vitin 2021.
