Komiteti për Mbrojtjen e Gazetarëve (CPJ) iu bashkua organizatave partnere shqiptare dhe ndërkombëtare në një letër të hapur, përmes së cilës u kërkon autoriteteve shqiptare të hetojnë rastet e përsëritura të dhunës dhe pengimit të gazetarëve që raportojnë për protestat, si dhe të garantojnë që përgjegjësit të mbajnë përgjegjësi.
Letra u publikua pas incidenteve të rënda të ndodhura në kryeqytetin Tiranë më 13 tetor, kur disa gazetarë raportuan se ishin sulmuar fizikisht ose penguar nga efektivë të policisë gjatë protestave për arsimin dhe çështjet sociale. Tre punonjës të medias patën nevojë për trajtim spitalor.
Ky nuk ishte një incident i izoluar. Më 8 tetor, gazetarët që po raportonin nga një protestë përpara Parlamentit u penguan nga policia, megjithëse identifikoheshin qartë si pjesëtarë të medias. Disa prej tyre u spërkatën me gaz irritues.
Në shtator, gazetarja e Citizens.al, Vjolanda Peca, u ndalua për një kohë të shkurtër ndërsa po raportonte nga një protestë.
Nënshkruesit e letrës u kërkuan policisë, organeve mbikëqyrëse, prokurorëve dhe institucioneve qeveritare të hetojnë incidentet, të ruajnë provat përkatëse, të zbatojnë udhëzimet ekzistuese për sigurinë e gazetarëve dhe të garantojnë që ata të mund të raportojnë në mënyrë të sigurt dhe pa pengesa gjatë tubimeve publike.
Letra i bëri thirrje Bashkimit Evropian, Këshillit të Evropës dhe Organizatës për Siguri dhe Bashkëpunim në Evropë (OSBE) që t’ua përcjellin autoriteteve shqiptare shqetësimet e organizatave nënshkruese.
Ajo theksoi gjithashtu se mbrojtja efektive e gazetarëve dhe zbatimi i të drejtave themelore dhe garancive përkatëse janë pjesë e angazhimeve të Shqipërisë në kuadër të procesit të anëtarësimit në Bashkimin Evropian.
