Policia italiane ndaloi 271 persona gjatë trazirave që shpërthyen në Milano të dielën, konfirmuan autoritetet.
Këto ngjarje shënuan ditën e dytë të protestave kundër shërbimeve të dobëta publike dhe rritjes së kostos së jetesës. Protestat u shoqëruan me përplasje me policinë, plaçkitje dyqanesh dhe shkatërrim prone, raporton KosovaPress.
Policia e rendit përdori gaz lotsjellës dhe topa uji kundër qindra protestuesve të maskuar, të cilët i vunë zjarrin koshave të mbeturinave dhe plaçkitën dyqane në qendër të qytetit.
Nga personat e ndaluar, 32 individë janë arrestuar zyrtarisht, njoftoi policia të hënën. Në mesin e tyre janë 23 të mitur dhe 13 shtetas të huaj. Procedura ligjore kanë nisur edhe ndaj 28 individëve të tjerë.
Trazirat në Milano pasojnë përplasje të ngjashme që ndodhën të shtunën në disa qytete në veri të vendit, përfshirë Bolonjën, Breshian, Bergamon dhe Torinon.
Në një raport të publikuar të dielën, policia deklaroi se 28 protestues ishin arrestuar gjatë incidenteve të mëparshme.
Situata në Itali të kujton atë në Francën fqinje, ku qindra mijëra njerëz dolën në rrugë të shtunën, të nxitur nga rritja e kostos së jetesës dhe përkeqësimi i shërbimeve publike.
Kryeministrja italiane, Giorgia Meloni, njoftoi se qeveria, e cila përballet me zgjedhje vitin e ardhshëm, do të zhvillojë një mbledhje të hënën për të diskutuar se si t’i përgjigjet situatës.
