Diego Simeone ka dalë në mbrojtje të Julian Alvarezit pas paraqitjes së tij në humbjen 2-1 të Atletico Madridit ndaj Barcelonës, duke kërkuar durim me sulmuesin argjentinas.
Atletico Madridi pësoi humbjen në shtëpi, duke i dhënë fund serisë prej shtatë fitoreve radhazi në La Liga. Ndonëse Alvarez kontribuoi me një asistim për golin e Giuliano Simeones në minutën e 10-të, ai shpërdoroi disa mundësi të mira shënimi, të cilat mund ta kishin ndryshuar rrjedhën e ndeshjes.
Barcelona arriti të përmbyste rezultatin falë golave të Fermin Lopezit, i cili fillimisht barazoi pak para përfundimit të pjesës së parë, ndërsa në minutën e 66-të realizoi edhe golin e fitores pas asistimit nga Lamine Yamal.
Megjithatë, trajneri Diego Simeone nuk dëshiron që sulmuesi i tij të vihet nën presion për rastet e humbura, duke vlerësuar kontributin e përgjithshëm të tij në këtë përballje.
“Julian pati një ndeshje të mirë,” deklaroi Simeone në konferencën për media pas ndeshjes.
Ai theksoi se përveç asistimit për golin e Giulianos, Alvarez krijoi edhe mundësi të tjera për bashkëlojtarët.
“Përveç asistimit të golit për Giulianon, ai gjithashtu bëri një krosim për një shans të Alex Baenës. Ne të gjithë donim që ai ta shënonte atë gol, por do të jemi të duruar me të sepse është një lojtar i shkëlqyer.”
“Ne e duam atë dhe, nëse do të arrijmë atë që duam të arrijmë, na duhet Juliani në formën e tij më të mirë – përndryshe nuk do të arrijmë atje”, shtoi trajneri argjentinas.
