Ndeshja miqësore mes New York Red Bulls dhe skuadrës meksikane America u shndërrua në kaos të vërtetë. Takimi i zhvilluar në New Jersey përfundoi me fitoren 1:0 të skuadrës amerikane, por rezultati mbeti në plan të dytë pas përleshjes masive që shpërtheu në minutën e 85-të.
Gjithçka nisi pas një ndërhyrjeje pranë vijës fundore të fushës. Debati verbal mes lojtarëve shumë shpejt u shndërrua në shtyrje dhe më pas në shkëmbim goditjesh. Në konflikt u përfshinë futbollistë të të dyja skuadrave, ndërsa bashkëlojtarët dhe anëtarët e shtabeve teknike përpiqeshin t’i ndanin.
Një nga momentet më të pakëndshme të regjistruara në pamje ishte veprimi i Andy Rojasit, futbollistit të New York Red Bulls, i cili e goditi në pjesën e pasme të kokës Dagoberto Espinozën e America-s. Pas qetësimit të situatës, gjyqtari ndëshkoi gjithsej pesë futbollistë me kartonë të kuq.
Te skuadra vendase u përjashtuan Ronald Donkor dhe Nehuen Benedetti, ndërsa te skuadra meksikane u detyruan ta linin fushën Emilio Lara, Ramón Juarez dhe Dagoberto Espinoza.
Deri më tani nuk dihet nëse Rojas do të ndëshkohet më vonë për përfshirjen e tij në incident. Situata u përshkallëzua edhe më shumë kur tifozët nga tribunat filluan të hidhnin sende në fushë. Pamjet e përleshjes u përhapën shpejt në rrjetet sociale.
Michael Bradley, trajneri i New York Red Bulls, pas ndeshjes nuk shfaqi shqetësim të madh për incidentin. Ai theksoi se karakteri miqësor i ndeshjes nuk do të thotë se lojtarët nuk do të kenë dëshirë për garë.
“Dëgjoni njerëzit duke thënë se nuk ka ndeshje vërtet miqësore. Lojtarët përsëri duan të garojnë dhe të fitojnë, pavarësisht se për çfarë lloj ndeshjeje bëhet fjalë. Kjo është pjesë e futbollit në disa mbrëmje”, deklaroi Bradley.
