Netflix ka shënuar një hap të rëndësishëm drejt së ardhmes teknologjike të industrisë së argëtimit duke përdorur për herë të parë Inteligjencën Artificiale Gjeneruese (IA) në një nga serialet e tij origjinale.
Lajmin e konfirmoi bashkë-CEO i kompanisë, Ted Sarandos, gjatë prezantimit të rezultateve financiare për tremujorin e dytë të vitit 2025. Ai deklaroi se seriali argjentinas i fantastikës shkencore “The Eternaut” është prodhimi i parë i platformës ku inteligjenca artificiale është përdorur për krijimin e efekteve vizuale.
“Ne mbetemi të bindur se Inteligjenca Artificiale është një mundësi e mahnitshme që mund t’i ndihmojë krijuesit të bëjnë seriale dhe filma më të mirë, jo vetëm më të lirë,” u shpreh Sarandos para analistëve.
Sipas tij, në një nga skenat kyçe të serialit, ku paraqitet shembja e një ndërtese në Buenos Aires, artistët e efekteve vizuale përdorën mjete të IA-së për të realizuar skenën në një kohë dhjetë herë më të shkurtër sesa me metodat tradicionale.
“Rezultati ishte mahnitës dhe u përfundua me një shpejtësi të jashtëzakonshme,” theksoi Sarandos. “Kostoja e efekteve pa përdorimin e inteligjencës artificiale do të ishte thjesht e tepërt për një serial me këtë buxhet.”
Seriali “The Eternaut”, bazuar në një roman grafik të famshëm argjentinas, ndjek një grup të mbijetuarish pas një reshjeje dëbore misterioze që shkatërron çdo gjë që prek, një fabul e errët dhe emocionuese që ka kërkuar efekte të sofistikuara për t’u realizuar.
Përfitim apo rrezik për punëtorët e industrisë?
Ndërsa përdorimi i IA-së është vlerësuar për efikasitetin dhe uljen e kostove, ai ka ngjallur gjithashtu shqetësime për sigurinë e vendeve të punës në industrinë e filmit. Kujtojmë se gjatë grevave të vitit 2023 në Hollywood, pikërisht përdorimi i inteligjencës artificiale ishte një nga çështjet më të debatueshme.
Sarandos u përpoq të qetësonte këto shqetësime:
“Këta janë njerëz të vërtetë që bëjnë punë të vërtetë me mjete më të mira. Krijuesit tanë tashmë po i shohin përfitimet në fazat e prodhimit, si planifikimi i xhirimeve dhe efektet vizuale,” tha ai. “Mendoj se këto mjete po i ndihmojnë krijuesit të zgjerojnë mundësitë e rrëfimit të historive në ekran, dhe kjo është jashtëzakonisht emocionuese.”
Rritje e të ardhurave për Netflix
Deklarata e Sarandos erdhi pas publikimit të performancës financiare të Netflix për tremujorin e dytë të vitit 2025, ku kompania raportoi të ardhura prej 11.08 miliardë dollarësh, një rritje prej 16% krahasuar me të njëjtën periudhë të vitit të kaluar. Një faktor kyç në këtë sukses ishte sezoni i tretë dhe i fundit i “Squid Game”, që tashmë ka arritur 122 milionë shikime globale.
