Kreu i Partisë Demokratike, Sali Berisha, ka reaguar përmes një postimi në rrjetet sociale duke e cilësuar si “mashtrim publik” njoftimin për arrestimet e bëra në lidhje me resortin pa leje në Kepin e Rodonit.
Berisha pretendon se lajmi i shpërndarë nga SPAK dhe mediat pranë qeverisë, sipas të cilit dy inspektorë të IMT u arrestuan dhe dy të tjerë u shpallën në kërkim, nuk është i vërtetë. Ai thekson se inspektorët janë liruar, ndërsa i vetmi që po mbahet në arrest është shoferi personal i drejtorit të IMT, Rigers Sheqeri.
“Sipas Berishës, çështja lidhet drejtpërdrejt me drejtorin e IMT, i akuzuar për lejimin e ndërtimeve pa leje dhe mbledhjen e ryshfeteve, ndërsa përgjegjësia po tentohet t’i faturohet vetëm shoferit të tij,” thuhet në postimin e tij.
Reagimi i ish-kryeministrit vjen pas aksionit të një dite më parë të SPAK dhe Policisë së Shtetit, gjatë të cilit u njoftua arrestimi i dy punonjësve të IMT.
