Kirurgë nga Skocia dhe SHBA-ja kanë kryer me sukses atë që besohet të jetë operacioni i parë në botë për trajtimin e goditjes në tru nga distanca, duke përdorur teknologji robotike.
Prof. Iris Grunwald nga Universiteti i Dundee ka kryer një trombektomi nga distanca – heqjen e një mpiksjeje gjaku pas një goditjeje në tru – mbi një kufomë njerëzore të dhuruar për mjekësi shkencore. Grunwald ka operuar nga spitali “Ninewells” në Dundee, ndërsa trupi ndodhej në anën tjetër të qytetit, në universitet.
Disa orë më vonë, Ricardo Hanel, një neurokirurg me bazë në Florida, kreu procedurën e parë robotike transatlantike nga zyra e tij në Jacksonville mbi një kufomë njerëzore në Dundee, rreth 6.400 kilometra larg.
Ekipi e ka përshkruar arritjen si një “ndryshim të madh loje” nëse miratohet për përdorim klinik, duke thënë se mund të revolucionarizojë trajtimin e goditjeve në tru, duke u mundësuar specialistëve të trajtojnë pacientët nga distanca.
Vonesat në arritjen e qendrave të specializuara të trajtimit mund të ndikojnë ndjeshëm në rezultatet e rikuperimit. Ekspertët kanë thënë se sistemet robotike mund ta mbyllin këtë boshllëk, veçanërisht në zona të largëta ose me shërbim të dobët.
“Ndiheshim sikur po shihnim për herë të parë një pamje nga e ardhmja. Ajo që më parë konsiderohej si fantashkencë, ne demonstruam se çdo hap i procedurës mund të kryhet tashmë”, ka thënë prof. Grunwald.
Universiteti në Dundee, një qendër trajnimi botërore për Federatën Botërore për Trajtimin Ndërhyrës të Goditjeve në Tru, është institucioni i vetëm në Mbretërinë e Bashkuar ku mjekët mund të operojnë mbi kufoma njerëzore me lëng që qarkullon në enë për të imituar rrjedhjen e gjakut njerëzor.
“Kjo ishte hera e parë që mundëm të kryenim gjithë procedurën e trombektomisë mekanike në një trup të vërtetë njerëzor për të treguar se çdo hap i saj është i mundur”, ka shtuar Grunwald.
Juliet Bouverie, drejtoreshë ekzekutive e Shoqatës së Goditjeve në Tru, e ka quajtur operacionin transatlantik “një inovacion të jashtëzakonshëm”.
“Ata që jetojnë në zona të largëta e rurale kanë qenë për shumë kohë të privuar nga qasja në trombektomi. Teknologjitë robotike si kjo mund të ndihmojnë në balancimin e pabarazive që ekzistojnë në trajtimin e goditjeve në tru në gjithë Mbretërinë e Bashkuar”, ka deklaruar ajo.
Studiuesit janë shprehur se suksesi i këtyre provave mund të hapë rrugën për adoptim global të trajtimit të goditjeve nga distanca, duke u mundësuar pacientëve në zona të izoluara të marrin trajtime shpëtuese pa pasur nevojë të udhëtojnë larg.
