Pas vitesh vonesash, organizatat mjedisore kanë shënuar një hap të madh në gjykatë kundër Aeroportit të Vlorës në Shqipëri. Organizata Euronatur njoftoi se Gjykata Administrative e Apelit më në fund e ka kthyer çështjen e Aeroportit të Vlorës për gjykim në shkallën e parë, që do të thotë se gjykata më në fund mund të kalojë në themel të çështjes.
Padia nga partnerët e EuroNatur @ppnea dhe @aos_alb, synon të mbrojë Lagunën e Nartës – një ligatinë e mbrojtur ndërkombëtarisht me rëndësi të jashtëzakonshme për migrimin e zogjve dhe pjesë e Deltës së Vjosës.
“Vonesa trevjeçare ka pasur pasoja shkatërruese për zonën që padia në të vërtetë kërkon të mbrojë. Pavarësisht padisë dhe apeleve të ndryshme nga Konventa e Bernës dhe Komisioni i BE-së për të ndaluar ndërtimin, punimet vazhduan në Lagunën e Nartës – duke shkaktuar shkatërrim masiv të një prej ekosistemeve më të vlefshme të Shqipërisë dhe Evropës”, thotë Annette Spangenberg, Drejtoresha e Programit të Ujërave të Ëmbël të EuroNatur.
Sipas Euronatur pamjet e fundit me aeroportin e përmbytur nga konfirmojnë se sa e rrezikshme është të ndërtosh në ligatina.
Hapja e rrugës së gjykimit në themel është një tjetër telash për projektin e aeroportit të Vlorës, i cili po hetohet edhe nga prokuroria e Tiranës pas padive të ndërsjellta penale që dy aksionerët kanë bërë kundër njëri tjetrit.
