Kryetari i Partisë Demokratike, Sali Berisha i cili ndodhet në Strasburg, gjatë diskutimeve në Asamblenë e Këshillit të Europës për monitorimin dhe zgjedhjet në Shqipëri, sulmoi ashpër kryeministrin Edi Rama, duke e cilësuar si ‘narko-diktator’ dhe rrezik serioz jo vetëm për Shqipërinë, por edhe për vendet europiane.
Berisha falënderoi drejtuesit e Asamblesë për anulimin e takimeve zyrtare të Ramës pas një fjalimi që ai e quajti të stilit alla-Gadaff, duke e konsideruar këtë një akt mbështetjeje për shqiptarët.
Ai deklaroi se qeveria shqiptare është e lidhur drejtpërdrejt me klane të drogës, të cilat sipas tij kontrollojnë një pjesë të konsiderueshme të tregut të kokainës dhe heroinës në disa vende të Europës.
Sipas kryedemokratit Sali Berishës, Shqipëria është shndërruar në një qendër të pastrimit të parave të krimit, ndërsa pas zgjedhjeve të 11 majit janë dhënë qindra leje ndërtimi si shpërblim për ndërhyrjen e grupeve kriminale në procesin zgjedhor.
Ai ngriti gjithashtu shqetësime serioze për sigurinë, duke pretenduar se persona të afërt me kryeministrin kanë pasur kontroll mbi Agjencinë Kombëtare të Teknologjisë së Informacionit dhe se të dhëna sekrete shtetërore janë shpërndarë tek kartelët e drogës dhe armiq të NATO-s. Kryetari i Partisë Demokratike Sali Berisha u bëri thirrje përfaqësuesve europianë të informojnë parlamentet e vendeve të tyre për rrezikun që, sipas tij, paraqet qeveria shqiptare.
Fjala e kryetarit të PD-së, Sali Berisha:
Zoti kryetar, sot në këtë sallë u cituan emra nga galeria e shëmtuar e disa diktatorëve dhe unë mendoj se përmendja dhe turpërimi i tyre publik është ndihmë për kombet e shtypura.
Ndaj dhe unë, dua të falënderoj kryetarët e grupeve parlamentare të Asamblesë së Këshillit të Europës, si dhe drejtuesit e kësaj asambleje, të cilët me një vendim mbështetës për shqiptarët, pas fjalimit të stilit të alla-Gadaff që mbajti në këtë sallë të nderuar, narko-diktatori i Tiranës, Edi Rama, i anuluan atij të gjitha takimet dhe drekën zyrtare.
Por unë sot, meqë diskutohet për monitorimin dhe zgjedhjet në Shqipëri, jam i detyruar t’ju paralajmëroj se Edi Rama, i cili rëndom tashmë quhet Ramaduro apo Noriega i Europës, paraqet aktualisht me qeverinë e tij një rrezik real serioz, jo vetëm për shqiptarët, por edhe për kombet tuaja.
Kjo sepse, klanet shqiptare të drogës të lidhura direkt me të janë sot, sipas UN-it, eksportuesit më kryesor të kanabisit dhe aksionerët më kryesorë në tregun e kokainës dhe heroinës në Europë. Ata janë përgjegjës për 65% të tregut të kokainës në Britaninë e Madhe, 36% të tregut të kokainës në Gjermani. Ata kanë sjellë në Rotterdam dhe në Antuerp, ngarkesat më të mëdha të kokainës në memorien e këtyre vendeve dhe të Europës.
Shqipëria sot, është parajsa e parave të trafiqeve të tyre kriminale.
Vetëm pas farsës elektorale të 11 majit, Edi Rama ka firmosur për këto klane 450 leje ndërtimi, për qindra kulla ndërtesa dhe resorte turistike si shpërblim për ndërhyrjen e tyre të fortë në zgjedhje.
Narkodiktatori i Tiranës, është një rrezik i madh për vendet tuaja, pasi së fundmi, në saj të të dhënave të institucioneve ligjvënëse të një vendi partner, është zbuluar se Ergys Agasi, koordinatori kryesor i tij për klanet e drogës, kishte dhënë me lejen dhe dijeninë e tij në kontroll total Agjencinë Kombëtare të Teknologjisë së Informacionit, në të cilin vet kreu i ekzekutivit nëpërmjet baxhanakut të tij ka garantuar qindra milionë euro, por ajo që përbën kërcënim madhor për vendet tuaja është se Ergys Agasi ka eksportuar drejt karteleve të drogës, por dhe armiqve të NATO-s, të gjitha të dhënat sekrete të depozituara në serverat e kësaj agjencie. Ndaj dhe unë sot, njerëzisht, kërkoj para jush ndihmën tuaj të informoni parlamentet e vendeve tuaja për këtë rrezik vërtet real të sigurisë suaj në disa aspekte.
Faleminderit!
