Një influencuese e re iraniane, e njohur në rrjetet sociale si “Baby Rider”, është vrarë gjatë protestave kundër regjimit në Iran. Diana Bahador, 19 vjeçe, motoçikliste dhe blogere me mbi 150 mijë ndjekës në Instagram, u qëllua për vdekje nga forcat e sigurisë gjatë përplasjeve të dhunshme në qytetin Gorgan, raportojnë mediat e huaja dhe organizatat për të drejtat e njeriut.
Sipas këtyre burimeve, e reja u qëllua dy herë rreth mesnatës së 8 janarit 2026, gjatë një operacioni represiv të Gardës Revolucionare Iraniane për shpërndarjen e protestuesve. Trupi i saj iu dorëzua familjes dy ditë më vonë, sipas grupit për të drejtat e njeriut Hyrcani Human Rights.
Mediat shtetërore iraniane kanë mohuar versionin zyrtar, duke pretenduar se Diana, e quajtur prej tyre me një emër tjetër, ka humbur jetën në një aksident me motor. Megjithatë, organizatat ndërkombëtare të të drejtave të njeriut thonë se familja është detyruar të publikojë deklarata të rreme në rrjetet sociale, si kusht për marrjen e trupit të saj.
Diana Bahador ishte bërë simbol i rezistencës, pasi publikonte shpesh video duke drejtuar motorin pa shami, një veprim i ndaluar për gratë sipas ligjeve iraniane. Regjimi islamik ndalon prej dekadash pajisjen e grave me patentë për motoçikleta.
Protestat në Iran shpërthyen në fund të dhjetorit 2025, të nxitura nga kriza ekonomike dhe rënia e monedhës kombëtare, dhe u përshkallëzuan në përplasje të dhunshme në disa qytete të vendit. Sipas burimeve të pavarura, autoritetet kanë përdorur armë të rënda dhe forcë ekstreme për të shtypur demonstratat.
Organizatat për të drejtat e njeriut raportojnë për qindra të vrarë dhe mijëra të plagosur, ndërsa Irani është përballur edhe me një bllokadë të gjerë digjitale, duke kufizuar qarkullimin e informacionit drejt botës së jashtme.
