Në dijeninë time pacientët nuk paguajnë në QSUT”, pas reagimeve drejtoresha thotë se deklarata u interpretua jashtë kontekstit
VNA publikoi dje një video nga konferenca për shtyp e ministres së Shëndetësisë dhe drejtoreshës së QSUT. Duke iu përgjigjur një pyetjeje të gazetarëve, kjo e fundit u shpreh:
“Në dijeninë time unë nuk kam njohuri për marrje lekësh dhe nuk kemi asnjë denoncim në strukturat përkatëse për marrje lekësh nga mjekët.”
Videoja, e cila ka marrë mijëra klikime dhe qindra komente nga qytetarë që e dinë shumë mirë se si funksionon “mjekësia falas” në Shqipëri, duket se ka shqetësuar “parinë” e shëndetësisë. Reagimi erdhi përmes një deklarate ku, ndër të tjera, thuhet se një përgjigje normale, e lidhur me një situatë konkrete, u përgjithësua më pas dhe u interpretua jashtë kontekstit, duke u kthyer në një moment që u shpërnda gjerësisht në rrjetet sociale.
QSUT shprehet se akuzat e pabaza ndaj personelit mjekësor ndikojnë drejtpërdrejt në besimin e qytetarëve ndaj stafit shëndetësor dhe dëmtojnë marrëdhënien mes pacientit dhe mjekut.
Në fakt, fjalët e zonjës Paparizo nuk janë nxjerrë aspak nga konteksti. Ato janë thënë qartë dhe pastër. Pas deklarimit për mosdijeninë e saj, nuk ka asnjë vazhdim të mendimit lidhur me pyetjen thelbësore: a ka dijeni QSUT se pacientët dhe familjarët e tyre paguajnë për të marrë shërbime?
Dikush duhet t’i thotë drejtoreshës se e vërteta është aq e qartë sa ulëret brenda dhe jashtë çdo konteksti. Dhe se fjalitë e bukura dhe propaganda nuk e fshehin dot faktin që shqiptarët paguajnë për të marrë shërbimin që qeveria e quan falas.
