Një studim i ri shkencor ka zbuluar se ngrohja globale është përshpejtuar ndjeshëm gjatë 10 viteve të fundit, duke rritur rrezikun që bota të arrijë kufirin kritik të ngrohjes globale më shpejt se sa ishte parashikuar.
Studimi, botuar të premten në revistën Geophysical Research Letters, tregon se Toka u ngroh me rreth 0.2°C për dekadë midis viteve 1970 dhe 2015, ndërsa midis viteve 2015 dhe 2025 temperatura mesatare globale u rrit me 0.35°C, një rritje prej 75% dhe niveli më i lartë që nga fillimi i mbajtjes së të dhënave në vitin 1880.
Ky përshpejtim vjen pavarësisht nga variacionet e përkohshme klimatike si El Niño, shpërthimet vullkanike dhe cikli diellor, që mund të maskojnë ndryshimet afatgjata.
Shkencëtarët paralajmërojnë se nëse kjo normë e përshpejtuar e ngrohjes vazhdon, bota mund të arrijë kufirin ndërkombëtar prej 1.5°C më shpejt se pritej, ndoshta para vitit 2030, duke sjellë pasoja të rënda për ekosistemet dhe jetën njerëzore. Ndikimet e ndryshimeve klimatike tashmë janë të dukshme, valë të nxehtësisë, uragane, zjarre dhe përmbytje kanë prekur pjesë të mëdha të botës.
Autorët e studimit, përfshirë Stefan Rahmstorf nga Instituti i Potsdamit për Kërkime mbi Ndikimin e Klimës, theksuan se ky është i pari studim që tregon një përshpejtim statistikisht të rëndësishëm të ngrohjes globale. Sipas tyre, analiza u bazua në pesë grupe të mëdha të të dhënave globale dhe filtrimin e ndikimeve afatshkurtra për të nxjerrë trendin afatgjatë.
Disa ekspertë, përfshirë Michael Mann nga Universiteti i Pensilvanisë, shprehen më të kujdesshëm, duke theksuar se disa rritje të nxehtësisë gjatë dekadës së fundit mund të lidhen me fenomene natyrore si El Niño. Megjithatë, të gjithë bien dakord se Toka po ngrohet dhe do të vazhdojë të ngrohet derisa emetimet e karbonit të arrijnë zero.
Shkencëtarët paralajmërojnë se veprimet urgjente për uljen e emetimeve janë jetike, përndryshe pasojat e ndryshimeve klimatike do të tejkalojnë aftësinë e njerëzimit për t’u përshtatur.
