Raporti vjetor 2025 i Strukturës së Posaçme kundër Korrupsionit dhe Krimit të Organizuar (SPAK), paraqet një panoramë të detajuar të luftës kundër korrupsionit dhe kriminalitetit në Shqipëri, duke evidentuar rritjen e aktivitetit hetimor, fokusin tek rastet më komplekse dhe përpjekjet për të goditur pasuritë me origjinë kriminale. Dokumenti përmbledh arritjet dhe sfidat e institucionit gjatë vitit të kaluar, si dhe progresin në përmbushjen e rekomandimeve të Bashkimit Europian në kuadër të procesit të integrimit.
Në fushën e korrupsionit, SPAK raportoi një intensifikim të hetimeve gjatë vitit 2025. Numri i çështjeve të reja për korrupsion është rritur me 17.7%, ndërsa hetimet e përfunduara janë rritur me 12.2% krahasuar me vitin paraardhës. Gjatë vitit janë dërguar në gjykatë 24 procedime penale me 147 të pandehur për korrupsion jo të nivelit të lartë dhe 10 procedime me 13 të pandehur për korrupsion të nivelit të lartë. Po ashtu, janë hetuar 30 zyrtarë dhe ish-zyrtarë të lartë, nga të cilët më shumë se gjysma, 18 persona, janë dërguar në gjykatë, ndërsa 10 prej tyre janë dënuar me vendime të formës së prerë.
Raporti evidenton se SPAK ka rritur gjithashtu fokusin në ndjekjen e pasurive të lidhura me korrupsionin dhe aktivitetet kriminale. Gjatë vitit 2025, vlera totale e aseteve të sekuestruara dhe konfiskuara arriti rreth 45.4 milionë euro. Nga kjo shumë, rreth 43.49 milionë euro përbëjnë pasuri të sekuestruara dhe rreth 1.91 milionë euro pasuri të konfiskuara përfundimisht. Në këtë total përfshihet edhe sekuestrimi i kriptovalutave të tipit Tether (USDT) me vlerë rreth 12.4 milionë euro, një nga rastet më të mëdha të sekuestrimit të aseteve digjitale në Shqipëri.
Krimi i organizuar mbetet një nga prioritetet kryesore të institucionit. Edhe pse numri i procedimeve të regjistruara është më i ulët se në vitin 2024, numri i çështjeve të përfunduara është rritur me rreth 3.4%, nga 58 në vitin 2024 në 60 gjatë vitit 2025. Në të njëjtën kohë, numri i personave nën hetim është rritur me 11.5% dhe numri i personave të dërguar në gjykatë është rritur me 36.6%, çka tregon një orientim më të fortë drejt hetimeve të strukturave më të mëdha kriminale dhe organizimeve komplekse.
Për veprat penale të lidhura me krimin e organizuar, vlera e pasurive të sekuestruara arriti në rreth 42.4 milionë euro, ndërsa pasuritë e konfiskuara për këtë kategori arritën në rreth 1.8 milionë euro. Në rastet që lidhen me zyrtarë të lartë, vlera e pasurive të sekuestruara ishte rreth 1.1 milion euro dhe rreth 100 mijë euro u konfiskuan përfundimisht.
Raporti thekson gjithashtu rritjen e volumit të përgjithshëm të hetimeve penale. Gjatë vitit 2025 janë hetuar gjithsej 871 procedime penale, nga të cilat 294 janë procedime të reja të regjistruara gjatë vitit, ndërsa 577 janë çështje të mbartura nga viti 2024. Krahasuar me vitin e mëparshëm, kjo përfaqëson një rritje prej rreth 4.9% të volumit të hetimeve. Nga këto hetime janë përfunduar 216 çështje gjatë vitit 2025.
Një tjetër tregues i rëndësishëm është rritja e hetimeve të nisura me iniciativë të vetë SPAK. Nga 294 procedime të reja të regjistruara gjatë vitit 2025, 109 janë nisur kryesisht nga Prokuroria e Posaçme, që përbën rreth 37% të totalit, një rritje e ndjeshme krahasuar me 19.8% në vitin 2024. Ky zhvillim tregon një qasje më proaktive të institucionit në identifikimin dhe ndjekjen e veprave penale të korrupsionit dhe krimit të organizuar.
Sa i përket besimit publik dhe bashkëpunimit me qytetarët, raporti evidenton se rreth 33.5% e procedimeve penale të nisura gjatë vitit 2025 kanë ardhur nga kallëzime të qytetarëve. Në të njëjtën kohë është rritur edhe bashkëpunimi institucional: referimet nga Policia e Shtetit janë rritur me rreth 70%, ndërsa referimet nga institucione të tjera publike janë rritur me rreth 15%.
Efektiviteti në gjykim mbetet i lartë. Vendimet e fajësisë përbëjnë rreth 87% të vendimeve të gjykatave për çështjet e hetuara nga SPAK, ndërsa vendimet e pafajësisë përbëjnë rreth 13%. Gjatë vitit 2025 janë ekzekutuar 70 vendime penale të formës së prerë me 251 të pandehur dhe 226 persona të dënuar.
Në tërësi, raporti vjetor 2025 tregon një rritje të aktivitetit të SPAK në hetimin e korrupsionit dhe krimit të organizuar, me fokus më të madh në çështje komplekse, hetime financiare dhe goditjen e pasurive kriminale. Institucioni ka rritur përdorimin e hetimeve proaktive dhe bashkëpunimin ndërkombëtar, ndërsa sfidat kryesore mbeten ngarkesa në rritje e punës, nevoja për më shumë staf dhe diferenca ende e madhe mes pasurive të sekuestruara dhe atyre të konfiskuara përfundimisht.
