Autoritetet në Havai kanë urdhëruar evakuimin urgjent të rreth 5,500 banorëve nga një zonë pranë një dige në ishullin Oahu, për shkak të rrezikut të menjëhershëm të shembjes si pasojë e përmbytjeve.
Sipas agjencisë lokale të menaxhimit të emergjencave, diga Diga Wahiawa ndodhet në një situatë kritike. Në paralajmërimin zyrtar, banorëve u është kërkuar të largohen menjëherë dhe të udhëtojnë në grupe për të shmangur bllokimet në trafik.
“Situata është shumë serioze në bregdetin qendror dhe verior të Oahu-së”, deklaroi Ian Shurring për mediat.
Autoritetet kanë ngritur pesë qendra pritjeje për personat e zhvendosur në zona të ndryshme të ishullit. Deri tani nuk raportohen viktima, por janë regjistruar disa raste ku banorët kanë mbetur të bllokuar për shkak të përmbytjeve, të cilat kanë shkaktuar dëme në shtëpi dhe automjete.
Guvernatori i Havai, Josh Green, tha se stuhia është shumë intensive, veçanërisht në veri të ishullit. “Gjatë natës pati reshje të dendura dhe përmbytje të mëdha në disa zona”, shkroi ai në rrjetet sociale.
Meteorologët paralajmërojnë se reshjet e shiut pritet të vazhdojnë edhe në ditët në vijim, ndërsa një alarm për përmbytje është shpallur për pjesën më të madhe të arkipelagut.
