Katër persona, tre burra dhe një grua kanë kryer një grabitje të hapur në një dyqan luksoz në një qendër tregtare në shtetin e New York, duke marrë me vete më shumë se një duzinë çanta të shtrenjta.
Ngjarja ndodhi më 16 prill në një dyqan Gucci në Woodbury Common Premium Outlets, ku grupi i dyshuar hyri me forcë dhe nisi menjëherë të thyente vitrinat pranë hyrjes. Sipas raportimeve, ata morën çanta me vlerë rreth 30,000 dollarë dhe hoqën shpejt sensorët e sigurisë para se të largoheshin.
Punonjësit e dyqanit mbetën të shokuar ndërsa grabitja ndodhte, ndërsa disa klientë u përpoqën të ndërhynin pa sukses. Pamjet e sigurisë tregojnë momentet kur çantat shpërndahen në dysheme dhe grabitësit i mbledhin me nxitim përpara se të ikin.
Sipas autoriteteve, të dyshuarit u larguan me një xhip të bardhë me qira dhe u ndoqën shkurtimisht nga policia në zonën e Newark, por ndjekja u ndërpre për arsye sigurie. Ata më pas braktisën automjetin dhe u arratisën në këmbë.
Policia në New York City dhe shtetet përreth është në kërkim të grupit, ndërsa dyshohet se ata mund të jenë të përfshirë edhe në grabitje të tjera në rajon. Veçanërisht, gruaja e dyshuar rezulton me disa urdhër-arreste të hapura për vjedhje të mëparshme.
Të katër personat mbeten ende në arrati, ndërsa hetimet po vazhdojnë në disa shtete njëkohësisht.
