Kryeministri Edi Rama i ka dhënë paralajmërimin e fundit ish-ministres Elisa Spiropali, për të cilën tha se, nëse gabon për herë të tretë, do të përjashtohet nga partia. Në një intervistë për “Koha Jonë”, Rama tha se e ka toleruar dy herët e para për shkak të kontributit të saj në PS.
“Çdo njeri mund të gabojë. Kush ka dhënë kontribute mund të gabojë edhe herën e dytë, e treta pastaj e ndan”, tha ai.
Në tentativë për t’i dhënë “ngjyra” të tjera debatit me Spiropalin dhe për të treguar se është ndryshe nga kundërshtari në opozitë, kryeministri u mundua t’i trajtojë thirrjet e deputetes me doza humori, duke thënë se janë në kontekst dashurie.
“Kush thotë hajde këtu më ke, ‘më vrit’, e thotë ngaqë të do. Kështu që nuk duhen marrë literalisht këto gjëra, janë krejt normale për sa kohë nuk prekin vijën e kuqe”, tha ai.
Në pjesën më të madhe të intervistës, Rama foli me ironi për mënyrën si drejtohet opozita, por kur u përmend e njëjta temë brenda PS-së, toni i tij u bë dukshëm më i kujdesshëm. Kjo tregon edhe paradoksin e Ramës: ndërsa kritikon Berishën për “dorë të fortë” në parti, vetë bën të njëjtën gjë brenda PS-së, duke folur për “vija të kuqe”.
