Finalja e këtij viti e Ligës së Kampionëve do të zhvillohet në një orar të pazakontë për tifozët europianë, me sfidën mes Arsenalit dhe PSG-së që nis në orën 18:00 në Budapest të Hungarisë. Vendimi i UEFA-s për ta zhvendosur finalen në një orar më të hershëm ka ngjallur diskutime të shumta, por sipas organizatorëve, ai është marrë për arsye organizative, televizive dhe sportive. Një nga argumentet kryesore lidhet me audiencën globale.
Futbolli europian ndiqet nga miliona tifozë në Azi, Amerikë dhe Lindjen e Mesme, ndaj një orar më i hershëm mundëson transmetime në kohë më të përshtatshme për tregjet ndërkombëtare televizive, duke rritur shikueshmërinë e finales.
UEFA argumenton gjithashtu se një ndeshje që përfundon më herët lehtëson aspektin e sigurisë dhe organizimit logjistik. Tifozët kanë më shumë mundësi të largohen nga stadiumi dhe qyteti pritës pa u përballur me probleme transporti apo flukse të mëdha njerëzish gjatë natës. Përfitime priten edhe për qytetin pritës, pasi tifozët do të kenë më shumë kohë për të festuar dhe për të shijuar atmosferën pas përfundimit të ndeshjes.
Presidenti i UEFA-s, Aleksander Çeferin, ka mbrojtur vendimin duke theksuar se ndryshimi është bërë me tifozët në qendër të vëmendjes.
“Me këtë ndryshim, ne e vendosim përvojën e tifozëve në qendër të vëmendjes. Finalja e Ligës së Kampionëve është kulmi i sezonit dhe ora e re e fillimit do ta bëjë atë më të arritshme, më gjithëpërfshirëse dhe më mbresëlënëse për të gjithë. Përfundimi më i hershëm i ndeshjes, edhe në rast të kohës shtesë apo penalltive, u jep tifozëve mundësinë të shijojnë pjesën tjetër të mbrëmjes me miqtë dhe familjen”, u shpreh Çeferin.
