Çun Lajçi ka ndarë një mesazh emocional në rrjete sociale, ku tregon se është kontaktuar nga të rinj që e ftojnë të marrë pjesë në një protestë për Shqipërinë.
Sipas tij, të rinjtë e kanë ftuar ta udhëheqë simbolikisht protestën, duke e krahasuar me figura historike dhe duke theksuar dashurinë për atdheun dhe tokën shqiptare.
Lajçi shprehet i prekur nga thirrja e tyre dhe thotë se, megjithëse “sot është vonë”, ai mbetet i lidhur me vendin dhe premton se do të rikthehet sërish pranë lumenjve dhe tokës shqiptare.
Postimi i plotë:
Nuk më paskan harrue.
E paskan gjetë numrin e celularit kjo rini lulëkuqesh, me flamuj plot shqiponja.
Më thirri njani prej tyne, njani që s’përton me i pri Drinit, Vjosës, Shkumbinit e çdo rrjedhe që buron prej zemrës shqiptare.
— Bac,
ti ishe në protestën e gjashtë, por ah, vaj medet që s’të njoftëm e ike pa ta thirrë emnin këto shqipet tonat.
A mund ta kemi nderin me t’pasë sot në ballë të kësaj rinie që rreh për Shqipninë?
Si Isa Begun të duem; jo me kobure, por me tirq e me shpirt që digjet për këtë tokë.
Me plisin mbushë me dheun e kullave të Jasharëve të duem,
si atëherë kur në altarin e lirisë ranë Ademi, Shabani e Hamza.
Si atëherë kur na jepje shpresë me fjalë që buronin prej shpirtit:
— Ky dhe nuk shitet.
Ky dhe nuk blehet.
Ky dhe vetëm bekohet me gjakun e shqiptarëve.
Prandaj eja.
Eja me plis e me atë grusht dhe,
e bekoji këta zogj shqipesh që s’duen lekë, por atdhe;
që s’dinë ç’është luksi, por dinë ç’është toka e të parëve.
Eja e na beko.
Thuaju se Zverneci e Shqipnia
janë dheu i atit e i birit të shenjtë.
Oh, sa u gëzova!
Thashë me vete:
Nuk më paskan harrue bijtë e bijat e shqipes.
— Sot asht vonë, — u thashë.
Por nesër, a mbasnesër,
prap do të lahem në dallgët e lumejve të Shqipnisë,
aty ku çdo gur flet shqip
e ku dheu ende mban erën e të parëve.
