Shtëpia e Bardhë ka reaguar zyrtarisht lidhur me vendimin për të mos lejuar hyrjen në Shtetet e Bashkuara të gjyqtarit somalez të futbollit, Omar Abdulkadir Artan, i cili ishte përzgjedhur nga FIFA për të marrë pjesë në Kupën e Botës 2026.
Sipas një deklarate të një zyrtari amerikan, pas një kontrolli shtesë nga autoritetet e Doganës dhe Mbrojtjes Kufitare (CBP), janë identifikuar informacione që, sipas autoriteteve amerikane, e bënin Artanin të papërshtatshëm për hyrje në SHBA.
“Pas inspektimit të mëtejshëm nga CBP, u zbuluan informacione nënçmuese, duke përfshirë lidhjen me anëtarë të dyshuar të organizatave terroriste. Kjo e bën udhëtarin të papërshtatshëm për hyrje në Shtetet e Bashkuara sipas Aktit të Imigracionit dhe Kombësisë”, thuhet në deklaratën e cituar nga mediat amerikane.
Autoritetet amerikane shtuan se administrata e Presidentit Donald Trump mbetet e vendosur për të mos lejuar asnjë rrezik të mundshëm për sigurinë kombëtare të hyjë në territorin e vendit.
Nga ana tjetër, Artan ka mohuar çdo lidhje me organizata terroriste dhe ka deklaruar se posedonte dokumentacionin dhe vizën e nevojshme për të hyrë në SHBA. Gjyqtari somalez ishte planifikuar të bëhej arbitri i parë nga Somalia që do të gjykonte në një Kampionat Botëror, por u ndalua në aeroportin e Majamit dhe më pas u kthye jashtë vendit.
Rasti ka shkaktuar reagime të shumta në botën e futbollit dhe në Somali, ndërsa FIFA ka konfirmuar se Artan nuk do të mund të marrë pjesë në turne, duke theksuar se vendimet për hyrjen në një shtet i takojnë autoriteteve të vendit organizator.
