Andy Burnham është një hap larg marrjes së drejtimit të Partisë Laburiste dhe postit të kryeministrit të Mbretërisë së Bashkuar, pasi ka siguruar mbështetjen e 322 deputetëve laburistë në ditën e parë të procesit të nominimeve për zgjedhjen e liderit të ri.
Burnham është aktualisht kandidati i vetëm i shpallur për të pasuar Sir Keir Starmer. Me vetëm një nominim më pak se 323 votat që do ta bënin matematikisht të pamundur kandidimin e një rivali, ai pritet të zgjidhet pa garë nëse deri në afatin e javës së ardhshme nuk paraqitet asnjë kandidat tjetër.
Nëse kjo ndodh, Burnham do të shpallet lider i Partisë Laburiste javën e ardhshme dhe më 20 korrik pritet të marrë zyrtarisht detyrën e kryeministrit.
Në reagimin e tij të parë, Burnham u shpreh “thellësisht mirënjohës” për mbështetjen e deputetëve, duke theksuar se ajo vjen nga të gjitha krahët e partisë dhe pasqyron nevojën për një qasje të re në politikën britanike. Ai premtoi një ekonomi të orientuar drejt qytetarëve, zhvillim të balancuar për të gjitha rajonet dhe reforma në mënyrën e qeverisjes.
Sipas rregullave të Partisë Laburiste, çdo kandidat duhet të sigurojë mbështetjen e të paktën 81 deputetëve, si dhe nominime nga të paktën tre organizata ose sindikata të lidhura me partinë. Burnham pritet ta plotësojë lehtësisht edhe këtë kriter.
Rruga e tij drejt udhëheqjes u lehtësua pasi ish-ministri i Mbrojtjes, Al Carns, hoqi dorë nga kandidimi, duke e lënë Burnham pa rival të deklaruar.
Ngjitja e Burnham në krye të Laburistëve vjen pas dorëheqjes së Sir Keir Starmer, i cili u largua nga posti pas presionit të shtuar brenda partisë, të shkaktuar nga humbjet në zgjedhjet lokale dhe rezultatet e dobëta politike.
Ish-kryetari i Bashkisë së Greater Manchester u rikthye së fundmi në Parlament pas fitores në zgjedhjet e pjesshme në Makerfield. Ai kishte kandiduar edhe më parë për drejtimin e Partisë Laburiste, në vitet 2010 dhe 2015, por pa sukses.
Javën e ardhshme, Burnham pritet të zhvillojë takimin e parë me deputetët laburistë për të paraqitur prioritetet e qeverisjes dhe vizionin e tij politik, ndërsa ka nisur edhe konsultimet me administratën shtetërore për përgatitjen e programit të qeverisë së ardhshme.
Edhe Sir Keir Starmer ka shprehur mbështetjen për pasardhësin e tij të mundshëm, duke deklaruar se e njeh Burnham prej vitesh dhe beson se ai do të jetë një kryeministër i mirë për Mbretërinë e Bashkuar.
