Deputeti i Partisë Demokratike, Luçiano Boçi, ka reaguar nga foltorja e Kuvendit lidhur me debatet për procedurat parlamentare dhe akuzat e mazhorancës ndaj opozitës.
Boçi deklaroi se nuk ka shmangur çështjen e votimeve dhe të “kartonave”, duke theksuar se sipas tij rëndësi kanë qëllimet dhe hapat e procedurave, jo datat formale.
Ai kërkoi që të mos krijohet panik, duke pretenduar se opozita ka qenë e angazhuar dhe ka punuar për proceset parlamentare. Boçi iu drejtua edhe kreut të grupit parlamentar socialist, Taulant Balla, duke deklaruar se ai ndodhet në Kuvend pavarësisht paralajmërimeve që, sipas tij, i ishin bërë.
“Nuk e shmanga çështjen e kartonëve. Datat janë formalitet, dhe ajo që është me rëndësi, janë qëllimet dhe hapat e procedurave. Mos përhapni panik, se kemi punuar. Falë vullnetit tonë, se ju punët i latë përgjysmë, pasi ne ishim gati. Unë erdha, këtu jam se më thoshte njeri nga ju nën zë; s’do të jesh këtu. Por unë këtu jam zoti Balla, por kam hall se ku do të përfundosh ti?!”, tha ai.
