Administrata e Donald Trump po i inkurajon kompanitë amerikane të kryejnë sulme kibernetike kundër hakerave.
Sipas një memorandumi të sigurisë kombëtare të nënshkruar nga presidenti amerikan të mërkurën vonë në mbrëmje, kompani të zgjedhura do të bashkëpunojnë me Departamentin e Drejtësisë dhe Departamentin e Sigurisë Kombëtare për të synuar grupet e huaja kriminale kibernetike përmes sulmeve hakerike.
Kjo praktikë do t’i sillte Shtetet e Bashkuara më afër vendeve si Kina dhe Rusia, ku agjencitë e inteligjencës janë mbështetur prej kohësh te hakerat e sektorit privat për qëllime të sigurisë kombëtare. Sulme të tilla do të lejonin si mbikëqyrjen e rrjeteve kriminale ashtu edhe ekzekutimin e operacioneve specifike të afta për të prishur, manipuluar ose shkatërruar sistemet dhe rrjetet e informacionit.
Nuk është e qartë se cilat kompani do t’i bashkohen iniciativës, por ky veprim shënon një përmbysje të qartë nga dekadat e politikave të sigurisë kibernetike, të miratuara nga administratat republikane dhe demokratike, të cilat i dhanë përparësi forcimit të mbrojtjes së korporatave dhe ia lanë sulmet kibernetike agjencive ushtarake dhe të inteligjencës amerikane.
Ekspertët e industrisë paralajmërojnë për rrezikun e krijimit të një “Perëndimi të Egër” kibernetik. Memorandumi specifikon, megjithatë, se kompanitë pjesëmarrëse duhet t’i nënshtrohen një procesi përzgjedhjeje për të hyrë në program, të nënshkruajnë një kontratë qeveritare që mbart gjoba deri në 1 milion dollarë për shkelje dhe të marrin autorizim nga Departamenti i Drejtësisë dhe Departamenti i Sigurisë Ndërkombëtare para se të kryejnë një sulm.
Politika gjithashtu ndalon sulmet që ka të ngjarë të rezultojnë në humbje jete, lëndime serioze ose që përbëjnë “një përdorim force ose sulm të armatosur sipas ligjit ndërkombëtar”.
