Historitë e luftës janë plot me rrëfime për trimëri të jashtëzakonshme, por disa prej tyre u përkasin edhe kafshëve që ndihmuan aleatët gjatë dy Luftërave Botërore. Zakonisht bëhet fjalë për kuaj dhe qen, por në raste të veçanta edhe për pëllumba. Një prej këtyre historive është ajo e Julianës, një qen gjerman që u bë e vetmja kafshë në histori që mori dy herë medaljen Kryqi Blu.
Në Mbretërinë e Bashkuar, trimëria e kafshëve gjatë luftërave është njohur prej kohësh me një sërë medaljesh të dhëna nga organizatat për mbrojtjen e kafshëve. Më e famshmja është Medalja Dickin, e akorduar nga PDSA, ndërsa më e hershme është Medalja Kryqi Blu. Të dyja vazhdojnë të jepen edhe sot, kryesisht për kafshë që kanë treguar heroizëm ose iniciativë të jashtëzakonshme. Gjatë historisë, ato u janë dhënë një larmie kafshësh me histori të jashtëzakonshme për të treguar, por ndoshta më e çuditshmja prej tyre është historia e kafshës së vetme që e fitoi dy herë Medaljen Kryqi Blu.
Dy medaljet e Julianës, qenit gjerman
Juliana, një qen gjerman, u nderua me Medaljen Kryqi Blu në vitet 1941 dhe 1944. Medaljen e dytë, që e mori në nëntor 1944, e fitoi pasi kishte paralajmëruar familjen e saj, Brittonët, për një zjarr që kishte shpërthyer në dyqanin e këpucëve që ata zotëronin. Medalja e parë, e marrë në prill 1941, iu dha për një ngjarje shumë më të pazakontë dhe të çuditshme, si për jetën e saj, ashtu edhe për historinë e Luftës së Dytë Botërore.
Megjithëse hollësitë e sakta të historisë së Julianës nuk janë plotësisht të qarta, besohet se diku në pranverën e vitit 1941, gjatë sulmeve të famshme ajrore gjermane “Blitz” kundër Mbretërisë së Bashkuar, një bombë ndezëse në flakë ra përmes çatisë së shtëpisë së familjes së saj. Me sa duket, zhurma dhe tymi nuk e trembën aspak Julianën. Thuhet se ajo iu afrua bombës, qëndroi mbi të dhe urinoi sipër saj, duke arritur ta shuante. Veprimi i saj, pavarësisht nëse ishte i qëllimshëm apo jo, shpëtoi shtëpinë e familjes dhe me gjasë edhe disa jetë njerëzish.
Fati i Julianës
Historia e jashtëzakonshme e Julianës u harrua dalëngadalë pas luftës. Ngjarjet që i kishin siguruar dy Medaljet Kryqi Blu u rikthyen në vëmendje vetëm shumë vite më vonë, kur një portret i saj, së bashku me një mbishkrim shpjegues dhe një nga medaljet e saj, u gjetën mes sendeve të dërguara te një drejtues vendas ankandeshpas zbrazjes së një shtëpie në Bristol, në jugperëndim të Anglisë.“Njerëzit zakonisht duan t’i ruajnë gjëra të tilla”, i tha në atë kohë drejtuesi i ankandeve PhilipTaubenheim BBC-së. “Vetëm për shkak se familja u prish, kjo pjesë përfundoi në treg.” Sendet u shitën më pas për 1100 paund.
Sikur të mos mjaftonte tragjedia që veprat e trimërisë së Julianës u harruan, edhe jeta e saj mori fund në rrethana të tmerrshme vetëm dy vjet pasi kishte marrë medaljen e dytë, në vitin 1946. Sipas raportimeve, një person i panjohur hodhi helm përmes kutisë postare të shtëpisë së Julianës dhe e vrau atë. Fatkeqësisht, nuk dihet sa vjeçe ishte në atë kohë. Por, po të mos kishte ndodhur kjo, ndoshta Danezja e Madhe që dikur kishte shpëtuar një familje nga një bombë do të kishte pasur edhe mundësinë të fitonte një medalje të tretë.
