Selena Gomez ka shitur vilën e saj luksoze në Encino, Kaliforni, për 5.4 milionë dollarë, pasi prona ishte nxjerrë në treg në muajin maj për 6.49 milionë dollarë.
Këngëtarja dhe aktorja 34-vjeçare e bleu vilën në vitin 2020 për 4.89 milionë dollarë. Rezidenca ka gjashtë dhoma gjumi, 10 banja dhe një sipërfaqe prej rreth 1,068 metrash katrorë.
Prona kishte qenë më parë në pronësi të ikonës së muzikës rock, Tom Petty, i cili e shiti atë në vitin 2017, disa muaj para se të ndërronte jetë në moshën 66-vjeçare.
Vila është e njohur edhe për faktin se aty Selena Gomez xhiroi emisionin e saj të gatimit, “Selena + Chef”, si dhe disa nga videot e saj për markën e kozmetikës Rare Beauty.
Rezidenca ofron një sërë hapësirash luksoze, mes tyre kuzhinë profesionale, bodrum vere, palestër, dhomë masazhi, hapësirë kreative, dhomë ngrënieje, studio për regjistrime vokale, dhomë pushimi, dhomë familjare dhe një suitë për mysafirët.
Në njoftimin e shitjes, prona përshkruhej si një rezidencë private e një personazhi të famshëm, e karakterizuar nga arkitekturë unike dhe materiale të cilësisë së lartë.
Shitja vjen më pak se dy vjet pasi Gomez dhe bashkëshorti i saj, Benny Blanco, blenë një rezidencë luksoze në Beverly Hills për 35 milionë dollarë, në dhjetor të vitit 2024.
