Modelja e njohur Emily Ratajkowski tërhoqi vëmendjen me paraqitjen e saj elegante, teksa u shfaq krah partnerit Romain Gavras në mbrëmjen gala të Muzeut të Akademisë në Los Angeles, të shtunën.
35-vjeçarja dukej më e dashuruar se kurrë me regjisorin francez 45-vjeçar, ndërsa dyshja pozoi së bashku për fotografët në tapetin e kuq, mes shumë personazheve të njohur, shkruan Daily Mail.
Emily kishte zgjedhur një fustan të kuq, të ngushtë pas trupit, që vinte në pah linjat e saj. Veshja spikaste me mëngë të përdredhura dhe detaje të rrudhosura në pjesën e belit, duke i dhënë një pamje elegante dhe tërheqëse.
Ndërkohë, Romain u paraqit me një kostum të zi, këmishë të bardhë dhe kravatë, duke kompletuar pamjen e tij klasike.
Regjisori francez, i cili më parë ka qenë në lidhje me këngëtaret e njohura Dua Lipa dhe Rita Ora, dukej në humor të mirë pranë modeles.
Çifti, për të cilin nisën të qarkullonin thashethemet për një lidhje romantike në nëntorin e kaluar, u pa duke shijuar mbrëmjen, përpara se të hynte në ambientet e muzeut.
