Kur u diagnostikua me kancer Olivia Munn hyri në një rrugëtim krejtësisht të papritur. Tri vjet më parë, aktorja e njohur u përball me lajmin tronditës se kishte kancer gjiri.
Munn zbuloi se kishte një formë agresive të kancerit invaziv të gjirit, në fazën e parë, pasi iu nënshtrua një vlerësimi të rrezikut për kancerin e gjirit. Më herët, ajo kishte marrë një rezultat normal nga mamografia dhe kishte kryer teste gjenetike, të cilat nuk tregonin asnjë arsye për shqetësim.
Më pas, me sugjerimin e mjekut, ajo kreu vlerësimin e rrezikut “Tyrer-Cuzick”, një sërë pyetjesh rreth historikut të saj mjekësor personal dhe familjar, që përdoren për të parashikuar gjasat e zhvillimit të kancerit të gjirit – çdo rezultat mbi 20 për qind konsiderohet rrezik i lartë. Rezultati i saj ishte 37,3.
Pas kësaj, ajo iu nënshtrua një rezonance magnetike (MRI), e cila zbuloi praninë e tumoreve.
“Isha përballë një mali frike,” thotë Munn, e cila më pas iu nënshtrua një mastektomie të dyfishtë dhe kuptoi se dëshironte të bënte gjithçka që kishte në dorë për të ndihmuar gratë e tjera.
“Ditën që fola për herë të parë publikisht për këtë dhe pashë reagimet, e kuptova në atë moment: ‘Oh, ky është misioni im. Kjo është ajo me të cilën mund të kontribuoj për botën.'”
E inkurajuar nga miku i saj, senatori Mark Kelly, Munn u përfshi në hartimin e një legjislacioni që synon përmirësimin e zbulimit të hershëm të kancerit të gjirit.
Legjislacioni i propozuar, të cilin Kelly synon ta paraqesë në Senat, përfshin krijimin e një grupi pune, detyra e të cilit është të rekomandojë mënyra për të përmirësuar qasjen ndaj mjeteve të vlerësimit të rrezikut.
Munn thekson se do të bënte një ndryshim të madh nëse mjekët do t’i diskutonin faktorët e rrezikut me gratë gjatë kontrolleve rutinë shëndetësore. Kjo do të përfshinte një mjet vlerësimi që e shpëtoi atë si dhe nënën e saj, e cila u trajtua me sukses për kancerin e gjirit vitin e kaluar.
“Ne kërkojmë shumë pak nga njerëzit, e megjithatë është diçka që ka një ndikim të madh dhe mund të shpëtojë shumë jetë,” tha Munn.
