Deputeti i Partisë Demokratike, Belind Këlliçi, ka reaguar me tone të ashpra ndaj drejtorit të Përgjithshëm të Policisë së Shtetit, Skënder Hita, duke e paralajmëruar se do të mbajë përgjegjësi për dhunën e ushtruar ndaj protestuesve, pas largimit të kryeministrit Edi Rama nga pushteti.
Në reagimin e tij, Këlliçi ka bërë një paralelizëm me zhvillimet në Serbi, ku sipas tij, një zyrtar policor i afërt me presidentin Aleksandar Vuçiç është arrestuar për shkelje të ligjit dhe krime të kryera për të mbrojtur pushtetin e këtij të fundit.
Sipas deputetit demokrat, i njëjti fat do të presë edhe zyrtarët shqiptarë që, sipas akuzave të tij, kanë ushtruar dhunë ndaj studentëve dhe të rinjve gjatë protestave.
Reagimi i Belind Këlliçit:
Skënder Hita ka marrë sot një mesazh se kush do të jetë fati i tij, pas rënies së autokratit të fundit në Ballkan, Edi Ramës.
I ngjashmi me të, homologu i tij në Beograd, që dhunoi studentët dhe të rinjtë protestues, u arrestua sot! U arrestua sepse shkeli ligjin dhe bëri krime për të mbrojtur karrigen e Vuçiç.
Kur shefi u rrëzua, ai përfundoi në burg.
Kur Rama të bjerë, dhe shumë shpejt kjo do të ndodhë, Skënder Hita dhe të gjithë ata që kanë dhunuar e gjakosur studentët e rininë shqiptare, do të japin llogari e do të prekin qelinë, sepse nuk do të jenë më mbi ligjin.
Mizoritë, dhuna barbare, torturat ndaj të rinjve shqiptarë nuk do të falen kurrë!
