Ballina Kosovë Kjo është gruaja e arrestuar e cila i sulmoi dje gazetaret në...

Kjo është gruaja e arrestuar e cila i sulmoi dje gazetaret në Prishtinë. Gazetarja: Policia e neglizhoi rastin

46
0

Është arrestuar gruaja që sulmoi gazetaret Lindita Berisha dhe Fjolla Hyseni të mërkurën në Rrugën C në Prishtinë.

Media mëson se ajo është Mira Bajraliu, dhe është ndaluar në kohëzgjatje prej 48 orëve.

Gazetaret e lajmi.net, Lindita Berisha dhe Fjolla Hyseni, dje (3 prill) kishin dalë për të realizuar një storie për autolarjet në rrugën “C”, por që u përballën me më të keqen.

Një sulm brutal fizik ndaj tyre, i kryer nga një grua dhe e ndihmuar nga një burrë që në atë moment shoqërohej me të.

Gjersa gazetaret, Lindita Berisha, Fjolla Hyseni dhe kameramani Përparim Tufa, po prisnin brenda një taksie për ta kryer pagesën, çifti i dyshuar ndodheshin në një veturë prapa tyre.

Të tejfrustruar pse taksisti ka bllokuar për ca sekonda rrugën, gruaja e dyshuar, siç përshkruan rastin gazetarja, është afruar afër veturës taksi dhe ka hapur me forcë derën e pasagjerëve prapa. Në atë moment, vozitësi i taksisë ka reaguar duke hapur dritaren.

Kaq ka mjaftuar që gruaja bashkë me burrin që ishte me të, të suleshin në një sulm brutal ndaj vozitësit të taksisë, pa paralajmërim, siç ka përshkruar gazetarja, duke e goditur dhe duke tentuar ta nxjerrin atë nga makina.

Lindita Berisha dhe Fjolla Hyseni janë sulmuar dje deri sa po kryenin punën e tyre në terren.

Sot gazetarja Lendita Berisha ka dhënë një prononcim për media.

Ajo ka treguar më shumë rreth rastit deri sa ka thënë se në pamje shihen vetëm afër 4-5 minuta, ndërsa sulmi ka vazhduar për një orë.

Berisha ka thënë se ardhja e Policisë së Kosovës në vendngjarje ka qenë e vonshme.

“Reagimi i institucioneve nuk është për tu admiruar, e kanë neglizhuar rastin”, ka thënë Berisha.

Gazetarja e cila ka qenë gjithashtu e sulmuar, Fjolla Hyseni nuk ka mundur të prononcohet për media për shkak të gjendjes së rëndë emocionale pas rastit.