Publikimi i trailerit të parë për vazhdimin e shumëpritur të The Devil Wears Prada 2 ka ndezur polemika në rrjetet sociale, vetëm pak javë përpara premierës së planifikuar më 1 maj.
Videoja 38-sekondëshe e shpërndarë nga 20th Century Studios më 16 prill prezanton disa elementë të rinj të historisë, mes tyre edhe një personazh dytësor që ka tërhequr vëmendjen e publikut. Bëhet fjalë për Jin Chao, e interpretuar nga Helen J. Shen, e cila shfaqet si ‘asistentja e re e ish-asistentes’ dhe ndërvepron drejtpërdrejt me Andy Sachs, roli i njohur i Anne Hathaway.
Menjëherë pas publikimit, rrjetet sociale u mbushën me reagime kritike. Një pjesë e përdoruesve kanë ngritur shqetësime se mënyra si paraqitet personazhi mund të përforcojë stereotipe të vjetra për komunitetin aziatik. Në veçanti, është komentuar kontrasti mes stilit të thjeshtë të Jin Chao dhe estetikës elegante që karakterizon pjesën tjetër të personazheve në trailer.
Po ashtu, diskutime ka nxitur edhe emri i personazhit, i cili sipas disa komentuesve tingëllon i ngjashëm me një term ofendues, duke shtuar akuzat për ndjeshmëri të munguar kulturore nga ana e produksionit.
