Specialistët e qarkullimit rrugor arrestuan në flagrancë shtetasin A. M., 63 vjeç, banues në Durrës, pasi dje, në lagjen nr. 15, duke drejtuar automjetin, ka përplasur motomjetin me drejtues shtetasin R. D. Si pasojë e aksidentit janë dëmtuar shtetasi R. D. dhe një shtetas që udhëtonte me të, të cilët po marrin ndihmë mjekësore në spital.
Specialistët për Hetimin e Narkotikëve arrestuan në flagrancë shtetasin A. Gj., 26 vjeç, banues në Durrës, pasi gjatë kontrollit në automjet, iu gjetën një sasi e vogël lënde e dyshuar narkotike Cannabis Sativa dhe një përforcues grushti, të cilat u sekuestruan në cilësinë e provës materiale.
Specialistët për Hetimin e Krimeve të Komisariatit të Policisë Durrës:
-ndaluan shtetasin në kërkim R. E., 29 vjeç, banues në Durrës, pasi Gjykata e Durrësit, më datë 11.03.2026, e ka dënuar me burgim, për veprën penale “Vjedhja”. Nga dënimi kanë mbetur për të kryer 3 muaj e 24 ditë burgim;
-referuan materialet në Prokurori, ku nisi procedimi penal për shtetasin A. T., 25 vjeç, banues në Durrës, për veprën penale “Prishja e qetësisë publike”.
Gjithashtu, këta specialistë referuan materialet në Prokurori, pasi kanë kallëzuar shtetasit:
-K. K., 22 vjeç, banues në fshatin Bisht Kamëz, Durrës, se në fshatin Sektor Rinia, i kanë vjedhur targat e automjetit. Punohet për identifikimin e kapjen e autorit/ve;
-I. L., se djali i tij, shtetasi E. L., 28 vjeç, është larguar nga banesa dhe prej 10 ditësh ka humbur kontaktet me të. Punohet për gjetjen e tij.
Specialistët për Hetimin e Krimeve të Stacionit të Policisë Manëz referuan materialet në Prokurori ku nisi procedimi penal për shtetasin D. Gj., 32 vjeç, pasi është konstatuar duke kryer punime ndërtimi, pa leje, në lokalin e tij.
Specialistët për Hetimin e Krimeve të Komisariatit të Policisë Kavajë referuan materialet në Prokurori ku nisi procedimi penal për shtetasin I. Xh., 36 vjeç, banues në Tiranë, pasi dyshohet se ka shqetësuar një 31-vjeçare, nëpërmjet thirrjeve telefonike.
Materialet procedurale iu referuan Prokurorisë së Durrësit, për veprime të mëtejshme.
