Një pjesë e veçantë e trashëgimisë së Matthew Perry do të dalë në ankand muajin e ardhshëm, në një iniciativë që nuk synon vetëm koleksionistët, por edhe një kauzë shumë më të madhe. Ankandi organizohet në bashkëpunim me Matthew Perry Foundation dhe të ardhurat do të shkojnë për të mbështetur luftën kundër varësive dhe për të ndihmuar njerëzit që përballet me këtë betejë në rrugën e rikuperimit.
Sipas njoftimit të Heritage Auctions, ankandi do të nisë më 5 qershor dhe ka për qëllim të çojë përpara misionin më të rëndësishëm të aktorit, ndërtimin e një bote ku varësia nuk shoqërohet me stigma dhe ku çdo person që kërkon ndihmë ka akses në kujdes, burime dhe mbështetje komunitare.
Përfituesit e këtij ankandi përfshijnë programe dhe iniciativa konkrete, si programi i specializuar i mjekësisë lidhur me varësitë në Massachusetts General Hospital, si dhe mbështetje për organizata që punojnë drejtpërdrejt në terren për rehabilitimin. Vetë Perry kishte luftuar për vite me radhë me varësinë, duke e kthyer më pas përvojën e tij në një mision për të ndihmuar të tjerët.
Në ankand do të përfshihen edhe objekte ikonike nga seriali legjendar Friends, që e bëri Perry të famshëm në mbarë botën. Mes tyre janë 26 skenarë të serialit, dy prej të cilëve të firmosur nga kasti kryesor, përfshirë Jennifer Aniston, Courteney Cox, Lisa Kudrow, Matt LeBlanc dhe David Schwimmer. Gjithashtu do të dalë në shitje një album fotografik i veçantë dhe një objekt simbolik nga seriali, korniza e verdhë e derës së apartamentit të Monikës, një detaj që është bërë pjesë e historisë së televizionit.
Lista përfshin edhe çmime dhe vepra arti, si trofeu SAG që Perry fitoi në vitin 1995, si dhe punime nga artistë të njohur si Banksy dhe Mel Bochner.
Objektet do të ekspozohen për publikun në Beverly Hills nga 18 deri më 29 maj, ndërsa ankandi do të zhvillohet si online ashtu edhe fizikisht në Dallas më 5 qershor.
Ky ankand nuk është thjesht një mundësi për të zotëruar një pjesë nga historia e një prej aktorëve më të dashur të televizionit, por edhe një mënyrë për të kontribuar në një kauzë që për Matthew Perry kishte një rëndësi të thellë dhe personale. Trashëgimia e tij, duket se vazhdon të jetojë jo vetëm përmes artit, por edhe përmes ndikimit real në jetën e njerëzve.
