Avokati Saimir Vishaj, një emër i njohur në fushën e drejtësisë shqiptare dhe me një karrierë të gjatë në avokati, ka njoftuar se ka marrë vendimin për të kandiduar për Kryetar të Dhomës Vendore të Avokatisë në Tiranë.
Pas një periudhe aspak të lehtë për të, ku i është dashur të përballet me sëmundjen e keqe dhe më pas me divorcin nga bashkëshortja, Vishaj ka zgjedhur t’i rikthehet fuqishëm angazhimit profesional dhe jetës publike.
Përmes një postimi në rrjetet sociale, Vishaj ka njoftuar kandidaturën e tij, duke theksuar më tej nevojën për një përfaqësim më të fortë dhe më pranë çdo avokati, si dhe për një Dhomë Avokatie më dinamike, më transparente dhe më përfaqësuese.
“Me përgjegjësi dhe bindjen se avokatia ka nevojë për një përfaqësim më të fortë dhe më pranë çdo avokati, shpall kandidaturën time për Kryetar të Dhomës Vendore të Avokatisë Tiranë. Me respekt dhe besim në mbështetjen tuaj për një Dhomë më dinjitoze, më aktive dhe më përfaqësuese për të gjithë ne”, shkruan Vishaj ndër të tjera.
