Erling Haalandi fitoi për herë të tretë në katër sezone Këpucën e Artë të Premierligës, pasi përfundoi sezonin me 27 gola në 35 paraqitje për Manchester Cityn. Sulmuesi norvegjez mungoi në humbjen 2-1 ndaj Aston Villas në ndeshjen e fundit të Pep Guardiolas si trajner i Cityt, por askush nuk arriti ta kalonte në garën për golashënuesin më të mirë.
Haalandi përfundoi përpara sulmuesit të Brentfordit, Igor Thiago, i cili realizoi 22 gola dhe fitoi një vend në kombëtaren e Brazilit për Kupën e Botës. Me këtë sukses, Haalandi u bashkohet Alan Shearerit dhe Harry Kanet si fitues tre herë të Këpucës së Artë në Premierligë. Vetëm Mohamed Salahu dhe Thierry Henry kanë fituar këtë çmim katër herë.
Sezoni i Haalandit ishte edhe një herë mbresëlënës, me 38 gola në 52 ndeshje në të gjitha kompeticionet dhe afro 3,000 minuta lojë në elitën angleze. Ai e kishte fituar më parë Këpucën e Artë në sezonin 2023/24 me 27 gola, ndërsa në debutimin e tij në 2022/23 vendosi rekord historik me 36 gola – numri më i madh i realizuar ndonjëherë në një sezon të vetëm të Premierligës.
Në total, Haalandi ka shënuar 162 gola në 198 paraqitje për Manchester Cityn dhe ka fituar dy tituj kampionë në Angli. Rëndësia e tij për skuadrën u pa sidomos gjatë një periudhe të vështirë në mes të sezonit, kur City humbi ritmin në garën për titull.
Në atë seri prej shtatë ndeshjesh, Haaland shënoi vetëm një herë – nga penalltia ndaj Brighton & Hove Albion – ndërsa City fitoi vetëm dy ndeshje. Ai u rikthye në formë në fund të sezonit, duke shënuar gola vendimtarë ndaj Liverpoolit dhe Arsenalit, por humbjet e pikëve ndaj Evertonit dhe Bournemouthit bënë që Arsenali të shpallej kampion për herë të parë pas 22 vitesh.
