Një valë e pazakontë të nxehti ka përfshirë pjesë të mëdha të Evropës, duke sjellë temperatura rekord dhe paralajmërime për rreziqe shëndetësore. Autoritetet në disa shtete kanë bërë thirrje për kujdes të shtuar për shkak të kushteve ekstreme të motit. Ndërkohë, Australia po përballet me stuhi të fuqishme, reshje intensive dhe rrezik për përmbytje në disa rajone.
Një valë e fortë të nxehti ka goditur këtë javë pjesë të mëdha të Evropës, duke thyer rekorde temperaturash në disa vende nën ndikimin e një zone të qëndrueshme të presionit të lartë, e njohur si “kupola e nxehtësisë”.
Në Mbretërinë e Bashkuar, temperatura arriti në 35.1 gradë Celsius në Kew Gardens të Londrës, duke vendosur rekord të ri për muajin maj, shkruan The Guardian. Rekordi i mëparshëm ishte vendosur vetëm një ditë më herët me 34.8 gradë Celsius. Edhe Irlanda regjistroi temperaturën më të lartë të muajit maj, me 28.8 gradë Celsius në dy stacione meteorologjike.
Temperatura rekord u regjistruan edhe gjatë natës. Në Camborne të Anglisë jugperëndimore, temperaturat nuk ranë nën 21.4 gradë Celsius, duke shënuar një tjetër “natë tropikale”. Në Francë, temperaturat arritën deri në 36 gradë Celsius, ndërsa autoritetet njoftuan se vala e të nxehtit ka shkaktuar shtatë viktima, drejtpërdrejt ose tërthorazi.
Meteorologët thonë se temperaturat në disa pjesë të Evropës kanë qenë 10 deri në 15 gradë mbi mesataren sezonale. Edhe pse pritet një rënie graduale javën e ardhshme, moti do të mbetet më i nxehtë se zakonisht.
Ndërkohë, në Australi janë lëshuar paralajmërime për stuhi të forta në rajonet juglindore dhe lindore të vendit. Autoritetet paralajmëruan për erëra të fuqishme, reshje intensive dhe breshër, ndërsa në disa zona janë regjistruar përmbytje të shpejta dhe erëra deri në 104 kilometra në orë.
