Trajneri Maran ka vendosur të bëjë tre ndryshime në formacionin titullar të Shqipërisë për ndeshjen miqësore ndaj Luksemburgut, duke prekur rreth 27% të skuadrës startuese në krahasim me sfidën e fundit ndaj Izraelit.
Lëvizjet më të rëndësishme janë në repartin ofensiv, ku nga minuta e parë do të aktivizohen Mirlind Daku dhe Myrto Uzuni, ndërsa në mesfushë hapësirë i është besuar Luis Hasës.
Në stol kanë përfunduar Ylber Ramadani, Armando Broja dhe Endri Mehmeti, tre nga emrat që ishin titullarë në ndeshjen e kaluar.
Pavarësisht ndryshimeve, boshti i skuadrës mbetet i pandryshuar. Sherri vazhdon në portë, ndërsa Hysaj, Ajeti, Gjimshiti dhe Mitaj formojnë sërish vijën e mbrojtjes. Në mesfushë konfirmohen Asllani dhe Laçi, ndërsa Hoxha ruan vendin në formacion.
Mbrojtja është reparti i vetëm që nuk preket nga rotacioni, duke treguar besimin e stafit teknik te prapavija kuqezi. Ndërkohë, sulmi është sektori më i rifreskuar, me dy ndryshime të rëndësishme që synojnë t’i japin më shumë dinamizëm dhe efikasitet ekipit në fazën ofensive.
Për Luis Hasën, aktivizimi nga minuta e parë përfaqëson një mundësi të rëndësishme për të treguar vlerat e tij me fanellën kuqezi, ndërsa Daku dhe Uzuni pritet të jenë pikat kryesore të repartit të avancuar në sfidën ndaj Luksemburgut.
