Këngëtarja dhe aktorja Jessica Simpson ka folur hapur për presionin që ka përjetuar në fillimet e karrierës së saj muzikore, kur drejtuesit e industrisë i kërkonin vazhdimisht të ndryshonte pamjen fizike.
Gjatë një koncerti në Pensilvani, 45-vjeçarja kujtoi se ishte vetëm 17 vjeçe kur kompania diskografike i kërkoi të humbiste rreth 7 kilogramë për t’iu afruar imazhit të yjeve të njohura të muzikës pop të asaj kohe, si Britney Spears dhe Christina Aguilera.
Simpson tregoi se në atë periudhë mendonte se ishte zgjedhur për talentin dhe zërin e saj, por shumë shpejt kuptoi se pamja e jashtme kishte po aq rëndësi për industrinë muzikore.
Sipas saj, kërkesat për të ndryshuar trupin vazhduan edhe gjatë publikimit të albumit të saj të dytë, kur iu kërkua të kishte një pamje më atletike dhe bark të tonifikuar.
Ajo pranoi se për vite me radhë është përpjekur të përmbushë pritshmëritë e të tjerëve për mënyrën se si duhej të dukej dhe të sillej, gjë që ndikoi edhe në vetëbesimin e saj.
Këngëtarja tha se shpesh ndihej sikur nuk ishte asnjëherë mjaftueshëm e mirë, pavarësisht suksesit që po arrinte në karrierë.
Jessica Simpson u bë e njohur në fund të viteve ’90 me hitin “I Wanna Love You Forever” dhe albumin “Sweet Kisses”. Pas një periudhe të gjatë larg muzikës, ajo u rikthye vitin e kaluar me projekte të reja, duke treguar se rikthimi në skenë e ka ndihmuar të rifitojë besimin në vetvete dhe të ndihet më e qetë me atë që është sot.
