Instituti i Statistikave (INSTAT) ka publikuar treguesit tremujorë të statistikave afatshkurtra për prodhuesit e të mirave, duke pasqyruar ecurinë e sektorëve të industrisë, energjisë, menaxhimit të mbetjeve dhe ndërtimit për tremujorin e parë të vitit 2026. Të dhënat dëshmojnë një rritje të ndjeshme të fondit të pagave në të gjitha aktivitetet ekonomike, ndërkohë që sektori i industrisë ka shënuar rënie në volumet e prodhimit dhe të punësimit.
Sipas metodologjisë së INSTAT, këto statistika “paraqesin ecurinë e ekonomisë së vendit në periudha tremujore, nëpërmjet të cilave kuptohet zhvillimi i ciklit të ekonomisë”. Ecuria e treguesve të volumit, punësimit dhe pagave paraqitet e ndryshme bazuar në aktivitetet specifike.
Ndërtimi ka regjistruar rritjen më të lartë të fondit të pagave. “Indeksi i fondit të pagave shënoi rritje 22,4 %, krahasuar me të njëjtën periudhë të një viti më parë”. Gjithashtu, indeks i shitjeve neto në volum u rrit me 8,6 %, prodhimi në volum me 7,2 % dhe numri i të punësuarve me 5,6 %.
Sektori energji elektrike, gaz, avull ka shfaqur rritje të fortë të prodhimit. “Indeksi i prodhimit në volum shënoi rritje 45,0 %, krahasuar me të njëjtën periudhë të një viti më parë”. Shitjet neto u rritën me 17,6 %, fondi i pagave me 13,1 %, ndërsa numri i të punësuarve u zgjerua me 2,1 %.
Aktiviteti i furnizimit me ujë, trajtimi dhe menaxhimi i mbetjeve shënoi rritje me 18,5 % të indeksit të fondit të pagave, 15,1 % në shitjet neto, 5,6 % në prodhim dhe një rritje të lehtë prej 0,3 % të numrit të të punësuarve.
Industria ka qenë i vetmi sektor që ka pësuar rënie në shumicën e treguesve volumetrikë. “Indeksi i prodhimit në volum shënoi rënie 4,9 %, krahasuar me të njëjtën periudhë të një viti më parë”. Shitjet neto në volum ranë me 3,1 % dhe numri i të punësuarve shënoi rënie me 2,9 %. Megjithatë, indeksi i fondit të pagave u rrit me 7,5 %.
Nga të dhënat e detajuara të tabelave statistikore pa përshtatje sezonale (referuar periudhës I.26 / I.25), konstatohet një diferencë e madhe brenda degëve të industrisë. Ndërsa industria përpunuese ka pësuar rritje pozitive në volumet e shitjeve me 2,5 % dhe të prodhimit me 1,0 %, rënia e përgjithshme e sektorit është ndikuar nga industria nxjerrëse.
Sipas tabelave zyrtare, në industrinë nxjerrëse, indeksi i shitjeve neto në volum shënoi një rënie prej “-28,1 %”, ndërsa indeksi i prodhimit në volum ra me “-26,7 %”.
Sa u përket grupimeve industriale kryesore, rritja më e madhe u vu re te grupi “Energji”, ku indeksi i prodhimit në volum shënoi rritje me “35,0 %”, ndjekur nga një rritje minimale e mallrave të ndërmjetme dhe mallrave të paqëndrueshme të konsumit.
