Julia Majchrzak dhe Lorenzo Alessi janë shpallur fitues të sezonit 2026 të spektaklit të njohur britanik “Love Island”, duke fituar çmimin e madh prej 50 mijë paundësh pas votimit të publikut.
Finalja e transmetuar drejtpërdrejt në ITV2 u prezantua nga Maya Jama. Çifti triumfoi pas një sezoni të mbushur me surpriza, rikthime dhe drama romantike, duke lënë në vendin e dytë Jasmin Müller dhe Kavan Murphy, ndërsa Simba Kudyiwa dhe Angelista Gunda u renditën të tretët.
Pas shpalljes së rezultatit, Julia u shpreh e emocionuar dhe falënderoi publikun për mbështetjen, duke thënë se nuk e kishte imagjinuar kurrë se do të arrinte deri në fitore pas hyrjes së saj në Casa Amor. Lorenzo, i habitur nga rezultati, mezi gjeti fjalët, ndërsa Julia zbuloi se shpreson që pas përfundimit të spektaklit ata të fillojnë një jetë së bashku.
Finalja e këtij sezoni u shoqërua edhe me një kthesë të papritur, pasi një çift u eliminua pak para shpalljes së fituesve, duke e bërë edicionin 2026 një nga më dramatikët në historinë e “Love Island”.
