Autoritetet turke kanë sekuestruar një mozaik dyshemeje rreth 1.500-vjeçar, që daton nga periudha e vonë romake, gjatë një operacioni kundër kontrabandës së objekteve antike në provincën e Mardinit. Dy persona janë arrestuar në kuadër të hetimeve.
Operacioni u zhvillua në koordinim mes njësive të Xhandarmërisë nga tre provinca dhe Drejtorisë për Luftimin e Kontrabandës dhe Krimit të Organizuar, me synim mbrojtjen e trashëgimisë kulturore dhe goditjen e rrjeteve të gërmimeve të paligjshme dhe trafikut të antikiteteve.
Gjatë kontrollit, përveç mozaikut të rrallë me figura të periudhës së vonë romake, autoritetet sekuestruan edhe një monedhë me vlerë historike, dy unaza, 13 objekte të tjera arkeologjike, tre gurë të çmuar, si dhe një libër referues me titull “Monedhat e Romës së Lashtë”.
Mozaiku i sekuestruar është dorëzuar pranë Drejtorisë së Muzeve të Mardinit, ku do t’i nënshtrohet ekzaminimeve të specializuara dhe procesit të konservimit. Autoritetet turke theksuan se operacioni është pjesë e përpjekjeve për të mbrojtur pasurinë kulturore të vendit dhe për të luftuar kontrabandën e objekteve me rëndësi historike.
